Nùmeri

41 Col tempo, i israeliti i ze partidi del monte Or e i ga acampà in Zalmona. 42 Dopo, i ze partidi de Zalmona e i ga acampà in Punon. 43 Alora, i ze partidi de Punon e i ga acampà in Obote. 44 Lori i ze partidi de Obote e i ga acampà in Igè Abarin, ndove scomìnsia la tera de Moabe. 45 Pi tardi, i ze partidi de Igin e i ga acampà in Dibon Gade. 46 Dopo, i ze partidi de Dibon Gade e i ga acampà in Almon Diblatain. 47 Lori i ze partidi de Almon Diblatain e i ga acampà nei monti dela region de Abarin, davanti a Nebo. 48 Alora, i ze partidi dei monti de Abarin e i ga acampà nele parte piane del deserto de Moabe, darente el rio Giordon, davanti Gericò. 49 E i ze restadi acampadi darente el rio Giordon, de Bete Gesimote fin Abel Sitin, nele parte piane del deserto de Moabe. 50 Nele parte piane del deserto de Moabe, darente el rio Giordon, davanti Gericò, Geovà el ga dito a Moisè : 51 “Te ghè de dir ai israeliti: ‘Valtri gavé de ndar de questa banda del rio Giordon fin la altra banda e ndar rento la tera de Canaan. 52 Gavé de parar via de davanti de valtri tuti quei che i ze de star in quela tera. Gavé de finir fora con tuti i posti ndove i fà adorassion e cole so stàtue de sassi e de metal. 53 E quela tera la sarà vostra e ndaré de star là, parché l’è sicuro che vao darvela. 54 Gavé de spartir la tera intrà le vostre fameie par meso dela sorte. I grupi grandi i guadagnarà una eransa pi granda, e i grupi pìcoli i guadagnarà una eransa pi pìcola. La vostra eransa la sarà de acordo cola sorte. Valtri ndaré ricever la vostra eransa de acordo cole tribo dei vostri antenati. 55 “‘Ma, se no volé parar via de davanti de valtri tuti quei che i ze de star in quela tera, lori i sarà par valtri come qualcossa che fà mal nei vostri oci e come spini nela vostra carne, e lori i ndarà tratarve mal nela tera ndove valtri saré de star. 56 E vao far contra valtri quel che mi gavea pensà de far contra lori.’”