Nùmeri

25 Quando el pòpolo de Israel l’era de star in Sitin, lori i ga scominsià a far imoralità sessual cole fiole de Moabe. 2 Le done le ndea far sacrifissi ai so dèi e le convidea i israeliti par ndar insieme. El pòpolo el ga scominsià a magnar e a indenociarse davanti dei so dèi. 3 Alora, Geovà l’è restà inrabià coi israeliti parché lori i ga scominsià a adorar Baal de Peor. 4 Geovà el ga dito a Moisè: “Ciapa tuti i paroni de questo pòpolo, cópeli e pícheli su davanti de Geovà intanto che l’è ancora di. Cossita, finirà la ràbia de Geovà contra Israel.” 5 Alora, Moisè el ga dito ai giuisi de Israel: “Cada un de valtri el ga de copar quei òmini che i ga scominsià a adorar Baal de Peor.” 6 Ma in quela ora un israelita insieme de una midianita i ze vegnesti rento el acampamento davanti Moisè e tuti i israeliti, intanto che el pòpolo el piandea ala entrada dela tenda de riunion. 7 Fineia, fiol de Eleazar, fiol de Aron, el sasserdote, el ga visto questo. Suito el se ga levà su de in meso del pòpolo e el ga ciapà una lansa. 8 Lu l’è ndato drio el omo de Israel rento la so tenda. E el ga sbusà de una banda al’altra, el omo de Israel e la dona par la parte genital dela dona. Cossita, la punission sora i israeliti la se ga fermà. 9 Quei che i ze morti par causa dela punission i ze stati 24.000. 10 Alora, Geovà el ga dito a Moisè: 11 “Par meso de Fineia, fiol de Eleazar, fiol de Aron, el sasserdote, la me ràbia la se ga slontanà del pòpolo de Israel, parché lu no’l ga acetà quando lori i ze stati infedeli a mi. Cossita, ancora che mi vui la adorassion sol par mi, no go finio fora coi israeliti. 12 Par quela, dighe che mi son drio far un acordo de pace con lu. 13 E questo sarà un acordo par lu e la so dissendensa de un sasserdòssio par sempre. Parché lu no’l ga acetà quando i altri i ze stati infedeli col so Dio e el ga fato che el pòpolo de Israel el fusse perdonà.” 14 El nome del israelita che l’è stà copà insieme cola dona midianita l’era Zinri, fiol de Salu, paron de una casa dei simeoniti. 15 La midianita che la ze stata copada la gavea nome Cosbi, fiola de Zur. Lu l’era paron de un dei grupi de fameie de Midian. 16 Dopo, Geovà el ga dito a Moisè: 17 “Va contra i midianiti e copeli, 18 parché lori i ze stati furbi in quel che i ga fato contra valtri, sora quel che ga sucedesto in Peor, e par causa de Cosbi, fiola de un paron de Midian e so sorela de lori. Ela la ze stata copada nel giorno dela punission in Peor.”