Nùmeri

13 Ma, se un omo l’era puro o no l’era mia drio viaiar, e no’l ga parecià el so sacrifìssio dela Pàscoa, el ga de esser finio fora de intrà el pòpolo parché no’l ga dato a Geovà la oferta nel tempo giusto. Questo omo el pagarà par el so pecato. 14 “‘E, se ghen’è un straniero che l’è de star intrà de valtri, anca lu el ga de pareciar el sacrifìssio dela Pàscoa par Geovà. Lu el ga de far questo de acordo cola lege sora la Pàscoa e dela maniera come i gavea de selebrarla. Questa lege la ga de esser la stessa par valtri e par i stranieri che i ze de star intrà de valtri.’” 15 Nel giorno che i ga fato su el tabernàcolo, o sia, la tenda del Testimònio, la nùvola lo ga querto. Ma, dela sera fin la matina dopo, qualcossa che parea esser fogo l’è restà sora el tabernàcolo. 16 Questo l’era quel che sempre sucedea: la nùvola lo querzea de di, e qualcossa che parea esser fogo lo querzea de note. 17 La nùvola la era sora la tenda e, sempre che la ndea su, i israeliti i ndea via suito. Ndove la nùvola la se fermea, lì i israeliti i acampea. 18 Quando Geovà el dea la òrdine i israeliti i ndea via. Quando Geovà el dea la òrdine i israeliti i acampea. Intanto che la nùvola la restea sora el tabernàcolo, i israeliti i seitea in quel acampamento. 19 Quando la nùvola la seitea tanti giorni sora el tabernàcolo, i israeliti i obedia a Geovà e no i ndea via. 20 Dele volte, la nùvola la restea pochi giorni sora el tabernàcolo. Lori i seitea lì acampadi de acordo cola òrdine de Geovà, e lori i ndea via de acordo cola òrdine de Geovà. 21 Dele volte, la nùvola la restea ferma sol dela sera fin la matina. Quando la nùvola la ndea su de matina, lori i ndea via. Se la nùvola la ndesse su de di o de note, lori i ndea via. 22 Intanto che la nùvola la fusse sora el tabernàcolo, sia par due giorni, un mese o pi tempo, i israeliti i seitea lì acampadi e no i ndea via. Ma, quando la nùvola la ndea su, lori i ndea via. 23 Lori i acampea de acordo cola òrdine de Geovà e i ndea via de acordo cola òrdine de Geovà. I obedia a Geovà de acordo cola òrdine che el gavea dato par meso de Moisè.