1 Samuel

2 Davi e i òmini che i era con lu i era nte un posto pien de sassi, nele montagne ndove le cavre le vive. Alora, Saul el ga scoliesto 3.000 dei meio òmini de tuto Israel e l’è ndà in serca de Davi. 3 Saul l’è rivà ndove ghen’era muri de sassi par le piégore drio la strada. Là ghen’era una caverna, e lu l’è ndà rento par far i so bisogni. Ma Davi e i òmini i era sconti nel fondo dela caverna. 4 I òmini che i era con Davi i ghe ga dito: “Ancoi l’è el giorno che Geovà el te dise: ‘Son drio darte el to nemigo nele to man, e te pol farghe quel che te vol.’” Alora, Davi l’è ndà pin pian e el ga taià un tocheto dela roba sensa màneghe de Saul. 5 Ma dopo Davi el ga sentio che el so cuor lo condanea parché el gavea taià un tocheto dela roba de Saul. 6 El ghe ga dito ai òmini: “Par rispeto a Geovà, mi mai faria una roba cossita al me paron, quel che Geovà el ga scoliesto. Mi mai ghe faria mal, parché lu l’è quel che Geovà el ga scoliesto.” 7 Cossita, quel che Davi el ga dito li ga fati fermarse, e lu no’l ga assà che i atachesse Saul. Intanto, Saul l’è ndà fora dela caverna e l’è ndà via. 8 Dopo, Davi l’è ndà fora dela caverna e el ga osà a Saul: “Me paron, el rè!” Quando Saul el ga vardà indrio, Davi el se ga indenocià cola fàcia par tera. 9 Davi el ghe ga dito a Saul: “Parché che te ghe badi a quei che i dise che mi vui farte mal? 10 Pròpio ancoi te ghè visto coi to oci che Geovà el me ga assà far quel che mi volesse con ti rento la caverna. Ma quando i me ga dito de coparte, te me ghè fato pecà e go dito: ‘Mi mai ghe farò mal, parché lu l’è quel che Geovà el ga scoliesto.’ 11 Alora, me pare, varda el tocheto dela to roba sensa màneghe qua nela me man. Quando ero drio taiarlo, no te go copà. Adesso te pol veder che no me vien in mente farte mal o ndar contra ti. No go fato gnente sbalià contra ti, anca se te sì drio vegnerme contra par coparme. 12 Geovà el sarà el giuis intrà mi e ti e Geovà el te castigarà par quel che te me ghè fato. Ma mi mai te farò mal. 13 Ghen’è un provèrbio de sti ani che el dise: ‘Ze i rugni che i fà quel che l’è rugno.’ Ma mi mai te farò mal. 14 Parché che el rè de Israel l’è drio ndar in serca de mi? Cossa sonti mi par ti vegnerme contra? Mi son come un can morto, come un pìcolo puldo. 15 Geovà el sarà el giuis e lu el giulgarà mi e ti. Lu el ndarà vardar quel che l’è drio suceder e el me difenderà. Lu el farà quel che l’è giusto e el me salvarà de ti.” 20 Adesso mi sò che l’è sicuro che te sarè rè e che el regno de Israel el seitarà con ti.