Gàlati

9 Quando Tiago, Cefa e Gioani i ga visto la maraveiosa bontà che mi gavea ricevesto, lori, che i era consideradi come colone dela congregassion, i ne ga dato la man a mi e a Barnabè par mostrar che i era de acordo che fussino ale nassion e lori a quei che no i era sirconsidadi. 10 I ne ga domandà solche de ricordarse dei poareti, e son drio sforsarme tanto par far cossita. 11 Ma quando Cefa l’è vegnesto a Antiochia, mi ghe go ciamà atension de maniera firme parché l’era ciaro che lu el gavea sbalià. 12 Parché vanti che i rivasse qualche òmini dela parte de Tiago, lu el magnea cole persone dele altre nassion; ma quando questi òmini i ze rivadi, lu el ga assà de farlo e el se ga slontanà par paura de quei che i difendea la sirconsision. 13 Anca i altri giudei i ze stati falsi compagno a lu. Fin Barnabè el se ga assà influensiar e l’è stato falso come lori. 14 Ma quando go visto che no i se comportea de acordo cola verità dele bone notìssie, go dito a Cefa davanti de tuti: “Se ti che te sì un giudeo te comporti compagno dele persone dele nassion e nò compagno dei giudei, come che te pol obrigar quei dele nassion a comportarse de acordo coi costumi giudei?” 15 Noantri, che par nassimento semo giudei, e no semo pecadori dele nassion, 16 savemo che el omo l’è considerà giusto nò parché el ga fato quel che la lege la manda, ma sol par via dela fede in Gesù Cristo. Alora ghemo fede in Cristo, par quela semo consideradi giusti par via dela fede in Cristo e nò parché ghemo fato quel che la lege la manda; infati nissun l’è considerà giusto parché el ga fato quel che la lege la manda. 17 Adesso, se anca noantri che volemo esser consideradi giusti par via de Cristo, semo consideradi pecadori, vol fursi dir che Cristo l’è al servìssio del pecato? Sicuro che nò! 18 Se mi fao su nantra volta quel che go finio fora, mi dimostro che son un pecador. 19 Parché par meso dela lege mi son morto par la lege, cossita che mi posso viver par Dio. 20 Mi son stà inciodà su nel pal insieme a Cristo. No son pi mi a viver, ma l’è Cristo che el vive insieme a mi. La vita che adesso vivo, la vivo de acordo cola fede che go nel Fiol de Dio, che el me ga amà e che el ga dato la so vita par mi. 21 Mi no ricuso la maraveiosa bontà de Dio, parché se qualchedun l’è considerà giusto par meso dela lege, alora Cristo l’è morto par gnente.