Nùmeri

7 Nel giorno che Moisè el ga finio de far su el tabernàcolo, lu lo ga untà e anca lo ga santificà con tuti i mòbili, el altar e tute le robe che se doperea lì. Dopo che el ga untà e santificà queste robe, 2 i paroni de Israel, o sia, i paroni de tribo, i ga fato una oferta. Lori, che i gavea tendesto de come l’è stà fato el registro, 3 i ga portà la so oferta davanti de Geovà: sei carete querte e dódese tori. Cada due paroni i ga dato una careta, e cada paron el ga dato un toro, e lori li ga portadi davanti el tabernàcolo. 4 Geovà el ga dito a Moisè: 5 “Aceta de lori queste robe, parché le sarà doperade par el laoro dela tenda de riunion. Te ghè de ciaparle e darle ai leviti de acordo con quel che ghe ocore par far i so laori.” 6 Alora, Moisè el ga acetà le carete e i tori, e li ga dati ai leviti. 7 Lu el ga dato due carete e quatro tori ai fioi de Gèrson, de acordo con quel che ghe ocorea par far i so laori. 8 Lu el ga dato quatro carete e oto tori ai fioi de Merari, de acordo con quel che ghe ocorea par far i so laori. Itamar, fiol del sasserdote Aron, el tendea de tute queste robe. 9 Ma Moisè no’l ga dato gnente ai fioi de Coate, parché i fea el laoro del posto santo e i gavea de portar le robe sacre nele spale. 10 I paroni i ga dato la so oferta nel giorno che el altar l’è stà dedicà e untà. Quando i paroni i ga dato la so oferta davanti el altar, 11 Geovà el ga dito a Moisè: “Cada giorno un dei paroni el darà la so oferta par dedicar el altar.”