2 Samuel

25 Quando lu l’è rivà a Gerusalen par catarse col rè, el rè el ghe ga domandà: “Parché che no te sì vegnesto con mi, Mefibosete?” 26 Lu el ga rispondesto: “Ò rè, el me servo el me ga imbroià. Mi son sòto e alora ghe go dito: ‘Pareciame el me mul, cossita vao insieme col rè.’ 27 Ma lu el me ga calunià davanti de ti, ò rè. Invesse, ti, ò rè, te sì come un àngelo del vero Dio. Alora, fà quel che te cati meio. 28 Ò rè, ti te gavarissi podesto copar tuti quei dela fameia de me pare. Ancora cossita, ti te me ghè assà restar con quei che i magna nela to tola. Alora, no go el dirito de domandarte pi gnente, ò rè!” 30 Alora, Mefibosete el ga dito al rè: “El pol ciapar tuto lu! Quel che importa l’è che ti te sì tornà casa in pace, ò rè.” 34 Ma Barzilai el ghe ga dito al rè: “Quanti ani de vita ancora mi go, par ndar col rè a Gerusalen? 35 Mi go belche 80 ani. Sarà che son bon de saver la difarensa intrà quel che l’è bon e quel che l’è rugno? Pol el to servo sentir el gusto de quel che el magna o de quel che el beve, o scoltar ancora la voce dei cantori e dele cantore?”