Génesi

3 La serpente la era la pi furba de tute le bèstie de mato che Geovà Dio el gavea fato. Alora, la ga dito ala dona: “L’è stà pròpio cossita che Dio el ga dito, che no gavé de magnar de tute le piante del giardin?” 2 La dona la ga rispondesto ala serpente: “Podemo magnar del fruto dele piante del giardin. 3 Ma, sora el fruto dela pianta che la ze in meso del giardin, Dio el ga dito: ‘No gavé de magnarlo, nò, gnanca gavé de tocarlo. Se valtri lo magné, ndaré morir.’” 4 Alora la serpente la ga dito ala dona: “Sicuro che valtri no ndaré morir. 5 Parché Dio el sa che, nel medèsimo giorno che valtri magné de questo fruto, i vostri oci i se verderà e valtri saré come Dio, savendo quel che l’è bon e quel che l’è mal.” 6 Par quela, la dona la ga visto che el fruto dela pianta l’era bon de magnar e l’era bel, si, la pianta la era bela de vardar. Cossita ela la ga ciapà el fruto e la ga scominsià a magnarlo. Dopo ela la ga dato del fruto anca al so sposo, quando lu lʼera insieme con ela, e el ga scominsià a magnarlo. 7 Alora, i oci de tuti due i se ga verti, e i se ga nicorti che i era nudi. Par quela, i ga cosio foie de figher par querzer i so corpi nudi. 9 E Geovà Dio el ciamea el omo e el ghe disea: “Sito ndove?” 10 Dopo de un tempo, lu el ga rispondesto: “Go scoltà la to voce nel giardin, ma son restà con paura parché ero nudo e par quela me go sconto.” 15 E mi farò che ti e la dona sìpie nemighi, e anca el to dissendente e el so dissendente. Lu el te schissarà la to testa, e ti te farè mal al so calcagno.” 16 Lu el ga dito ala dona: “Quando ti te sarè drio spetar un fiol, el to dolor el sarà pi grando. Ti te ndaré guadagnar i to fioi con tanto dolor, e ti te volarè star insieme col to omo, e lu el te dominarà.” 17 E lu el ga dito a Adon: “Maledeto sìpia el solo par la to colpa parché te ghè scoltà la to dona e te ghè magnà del fruto che mi te go dito: ‘No stà magnar el fruto’. Con dolor te magnarè quel che la tera la produse tuti i giorni dela to vita. 18 Lu el produserà par ti spin e mato, e ti te magnarè le piante del campo. 19 Col sudor dela to fàcia te magnarè pan, fin che te torni ala tera. Parché te sì polver e ala polver te ritornarè.” 23 E alora, Geovà Dio lo ga parà via del giardin del Èden par arar la tera de che el gavea stato tirà. 24 E cossita el ga parà via el omo, e lo ga postà i cherubini dela banda leste del giardin del Èden e la làmina con fiame de una spada che la continuea a ndar a torno par tender la strada fin la pianta dela vita.