Daniel

28 Ma ghen’è un Dio nel cielo e lu el spiega i segreti. Lu el ga mostrà al rè Nabucodonosor quel che ndarà suceder nei ùltimi giorni. Questo l’è quel che te ghè insognà e queste le ze le vision che te ghè bio intanto che te eri butà do nel to leto: 31 “Ò rè, nela vision, te ghè visto una stàtua tanto granda. Questa stàtua che la era tanto granda e che la slusea la era davanti de ti e la fea paura. 32 La testa dela stàtua la era de oro puro, el peto e i brassi i era de argento, la pansa e la parte de sora dele gambe le era de rame, 33 le gambe le era de fero e i pié i era parte de fero e parte de baro. 34 Intanto che te eri drio vardar, un sasso l’è stà taià via de un monte, sensa esser stà una persona a taiarlo. El sasso l’è vegnesto contra i pié dela stàtua che i era de fero e baro, e li ga fati a tochi. 35 Alora, el fero, el baro, el rame, el argento e el oro i ze stati fati a tochi nte un sol colpo e i ze restadi come la paia che la zola nei campi nel istà. El vento li ga portà via e no se podea pi catarli. Ma el sasso che l’è vegnesto contra la stàtua l’è deventà un grando monte e el ga querto tuta la tera. 41 “E anca te ghè visto che i pié e i dei dei pié i era fati de fero e del baro che el olero el dopera. Par quela, el regno el sarà spartio, ma el sarà un pochetin duro come el fero, parché te ghè visto che ghen sarà el fero insieme al baro. 42 E, cossita come i dei dei pié i era fati de fero e baro, anca una parte del regno la sarà forte e una parte la sarà fiaca. 43 Cossita come te ghè visto el fero insieme al baro mol, lori i sarà insieme cole persone, ma no i sarà unidi un col altro, compagno el fero e el baro no i resta unidi. 44 “Nei giorni de questi rè, el Dio del cielo el farà governar un regno che mai el sarà finio fora. E questo regno no’l sarà passà a nissun altro pòpolo. El ndarà farli a tochi e el finirà tuti questi regni, e sol lu el restarà par sempre. 45 L’è cossita come ti te ghè visto che un sasso l’è stà taià via del monte, sensa esser stà una persona a farlo, e el ga fato a tochi el fero, el rame, el baro, el argento e el oro. El Grando Dio el ga mostrà al rè quel che ndarà suceder nel futuro. Quel che te ghè insognà l’è vero e te pol fidarte in quel che ghe vol dir.”