Deuteronómio

3 “I vostri oci i ga visto quel che Geovà el ga fato nel caso de Baal de Peor. Geovà, el to Dio, el ga copà tuti quei intrà de valtri che i ze ndati drio Baal de Peor. 4 Ma valtri che seité darente de Geovà, el vostro Dio, sì tuti vivi ancoi. 5 Vardé, mi ve go insegnà decreti e comandamenti, pròpio come Geovà, el me Dio, el me ga dito de far, par giutarve a esser obedienti nela tera che ndaré ciapar par valtri. 6 Valtri gavé de far pròpio come mi ve go dito de far. Cossita, ndaré mostrar la vostra sabedoria e cognossensa davanti ai pòpoli che i ndarà scoltar sora queste lege. Lori i dirà: ‘Sicuro che questa nassion la ze sàbia e la ga tanta cognossensa.’ 7 Che granda nassion la ga dèi che i giuta cossita come Geovà, nostro Dio, che l’è sempre darente de noantri quando domandemo el so aiuto? 8 E che granda nassion la ga decreti e comandamenti compagno tuta questa Lege che mi ve dao ancoi? 9 “Stà ben atento e tendi par no desmentegarte dele robe che i to oci i ga visto, e par tegnerle darente el to cuor tuti i giorni dela to vita. Te ghè anca de contarle ai to fioi e ai to neti. 10 Nel giorno che te eri davanti de Geovà, el to Dio, in Orebe, Geovà el me ga dito: ‘Te ghè de far el pòpolo vegner davanti de mi par scoltar quel che mi vao dir, cossita lori i pol imparar a gaver profondo rispeto par mi tuti i giorni dela so vita e insegnarghe ai so fioi.’ 11 “Alora, valtri sì rivadi darente el pié del monte. El monte l’era drio brusar e le fiame le rivea fin al cielo. L’era scuro e ghen’era tante nùvole. 12 E Geovà el ga scominsià a parlarve de in meso el fogo. Valtri gavé sentio quel che lu el disea ma no gavé visto nissuni, gavé sol scoltà una voce. 13 E lu el ve ga dato i Diese Comandamenti, o sia, el so acordo che gavé fato e che lu el ve ga mandà obedir. Dopo, lu li ga scriti in due tole de sasso. 23 Gavé de star atenti par no desmentegarse del acordo che Geovà, el vostro Dio, el ga fato con valtri. No sté far gnanca una stàtua de adorassion compagna qualcossa che Geovà, el vostro Dio, el ve ga proibio de far. 39 Alora, ancoi, te ghè de saver e meter nel to cuor che Geovà l’è el vero Dio nel cielo e nela tera. No ghen’è nissun altro.