1 Piero

5 Alora mi, che anca mi son ansiano, che go visto i sofrimenti de Cristo e che anca vao ricever la glòria che la sarà mostrada, domando ai ansiani intrà de valtri de far questo: 2 Tendé dele piégore de Dio che le ze soto la vostra responsabilità. No sté far el laoro de superintendente par forsa, ma con voia. No sté farlo par benefìssio disonesto, ma de tuto el cuor davanti de Dio. 3 E no sté farlo come se valtri fussi paroni sora quei che i ze propietà de Dio, ma deventé esémpio par le piégore. 4 E quando el pastor prinsipal el mostrarà el so poder, valtri riceveré la corona de glòria che no la se rovina. 5 E anca valtri, òmini pi gióveni, gavé de obedir ai ansiani. Gavé de mostrar tanta umiltà intrà de valtri, parché Dio l’è contra i orgoliosi, ma el mostra la so granda bontà a quei che i ze ùmili. 6 Alora, gavé de umiliarve soto la man poderosa de Dio, e cossita lu el ve alsarà su nel tempo giusto, 7 intanto che buté sora lu tute le vostre preocupassion, parché lu el tende de valtri. 8 Mantegneve atenti, sté vigilanti. El vostro nemigo, el Diaol, l’è intorno de valtri come un leon che urla, drio ndar in serca de qualchedun par finirlo fora. 9 Ma, gavé de meterve contra lu, firmi nela fede, savendo che tuta la nostra fameia de fradei nel mondo la ze drio passar par i medèsimi sofrimenti. 10 Ma, dopo de sofrir par poco tempo, el Dio che el dà la maraveiosa bontà de tante maniere e che el ve ga ciamà par la so eterna glòria par meso de Cristo, el ndarà pareciarve del tuto par servir ai altri. Lu el ve farà forti, el ndarà giutarve a mantegnerve fedeli e el ve meterà nte un posto firme.