1 Timòteo

3 Queste parole le ze de fidarse: Se un omo l’è drio sforsarse par esser un superintendente, el vol far un laoro tanto bon. 2 Alora, el superintendente el ga de far tuto polito, esser maridà con una sol dona, esser echilibrà in quel che el fà, gaver bon giudìssio, esser organisà, ricever ben i altri e esser bravo de insegnar. 3 No’l ga de esser ciucheton gnanca violento, ma el ga de pensar de maniera echilibrada. Lu no’l ga de esser un che el vol sempre barufar e no’l ga de amar i soldi. 4 El ga de tender ben dela so fameia, e par via de quel che el fà, i so fioi i ghe obedisse e i lo rispeta. 5 (Parché, come che un omo el ndarà tender dela congregassion de Dio se no’l sa tender dela so fameia?) 6 No’l ga de esser un che l’è pena deventà dissìpolo de Cristo. Cossita lu no’l deventarà orgolioso e no’l gavarà el giulgamento che el Diaol el mèrita. 7 El ga anca de ver una bona reputassion davanti le persone de fora dela congregassion. Cossita no le parlarà gnente de bruto sora lu e lu no’l cascarà nte una tràpola del Diaol. 8 Dela medèsima maniera, i servi ministeriai i ga de esser òmini de fidarse e che i parla sempre la verità. Lori no i ga de bever massa vin, gnanca voler ciapar soldi de maniera sbaliada. 9 Ma i ga de viver cola cossiensa neta de acordo col sacro segreto dela fede. 10 Anca, prima se ga de veder se lori i ga le abilità che ghe vol. Dopo, se no ghen’è gnente de rugno contra lori, i pol servir come ministri. 11 Dela medèsima maniera, le done no le ga de esser caluniadore, le ga de esser persone de fidarse, echilibrade in quel che le fà e fedele in tute le robe. 12 I servi ministeriai i ga de esser maridadi con una sol dona, e tender ben dei so fioi e dela so fameia. 13 Parché i òmini che i laora ben i ze drio farse una bona reputassion e i pol parlar con granda confiansa sora la fede in Gesù Cristo.