1 Timòteo
4 Ma, la Parola ispirada la dise de maniera ciara che nel futuro arquanti i se slontanarà dela fede parché i ghe darà atension a dechiarassion ispirade che le imbroia e a insegnamenti de demoni, 2 e questo sarà par colpa dela ipocrisia dei òmini che parla busie e che i ga la cossiensa marcada come se la fusse marcada con un fero caldo 3 Lori i proibisse le persone de maridarse e i manda de no magnar arquanti alimenti. Dio el ga creà questi alimenti col ogetivo de che le persone che le ga fede e le cognosse la verità giusta li magna e li ringràssia. 4 Infati tuto quel che Dio el ga creà l’è bon e no se pol ricusar gnente se l’è ricevesto con ringrassiamento, 5 parché el magnar l’è santificà par meso de la parola de Dio e la orassion. 6 Se te dè questi consili ai fradei te sarè un bon servo de Gesù Cristo, che se alimenta cole parole dela fede e dei boni insegnamenti che te ghè seghio con fidelità. 7 Ma te ghè de ricusar stòrie false che le va contra Dio, come quele stòrie che le done vècie le conta. Invesse trena a ti stesso col ogetivo de mostrar devossion a Dio. 8 Far esersissi l’è bon par qualcossa, ma la devossion a Dio la ze bona par tuto, parché ghen’è la promessa de vita adesso e anca nel futuro. 9 Questa dechiarassion la ze degna de confiansa e la mèrita de esser acetada de maniera completa. 10 L’è par questo che noantri laoremo tanto e se sforsemo, parché la nostra speransa la ze nte un Dio che el vive, che l’è Salvador de tuti i tipi de persone, spessialmente de quei che i ze fedeli. 11 Seita dar queste òrdine e insegnarle. 12 No stà assar che nissuni te manche de rispeto parché te sì gióveno. Pitosto deventa un esémpio par i fedeli nel parlar, nela condota, nel amor, nela fede, nela castità. 13 Fin che mi vegno, seita sforsarte par leder in pùblico, par dar consili, e par insegnar. 14 Tendi del to don che Dio el te ga dato che i profeti i ga profetisà sora ti quando che el corpo de ansiani i ga metesto le man sora ti. 15 Te ghè de pensarghe sora queste robe. Te ghè de dedicarte in queste robe de maniera completa. Cossita tuti i vederà el to progresso de maniera ciara. 16 Seita a far el to meio par esser un bon esémpio e par insegnar ben ai altri. Seita a far tute queste robe, cossita te salvarè a ti e a quei che i te scolta.