2 Corinti

11 Me piaseria che valtri me soportasse anca se son un poco sensa giudìssio. Ma, in verità, valtri sì drio soportarme! 2 Compagno Dio, mi son geloso de valtri, parché mi stesso ve go prometesto in matrimònio a un sol sposo, el Cristo, par darve a lu come una vèrgine pura. 3 Ma go paura che, cossita come la bissa la ga imbroià Eva, le vostre mente le sìpia portade lontan dela sinsierità e dela puressa che el Cristo el mèrita. 4 Infati, se qualchedun el vien a predicar un Gesù difarente de quel che ve ghemo predicà, o se ricevé un spìrito difarente de quel che gavé ricevesto o se ve porta bone notìssie difarente de quela che gavé acetà, sarà fàcile soportarlo. 5 Mi cato che mi no son par gnente manco dei apòstoli che i se cata i pi importanti. 6 Anca se no son mia bon de parlar polito, sicuro che go cognossensa; ghemo assà questo ciaro de tute le maniere e in tute le robe. 7 Go fursi pecà quando ve go proclamà le bone notìssie de Dio sensa farve pagar gnente e quando me go umilià par valtri sentirse pi importanti? 8 Par servir a valtri, go ciavà altre congregassion quando go acetà el so aiuto. 9 E quando go bio de bisogno intanto che ero con valtri, no son stà un peso par nissuni, parché i fradei che i ze vegnesti dela Macedonia i ze stati generosi e i me ga dato quel che gavea de bisogno. Mi go fato tuto el possìbile par no esser un peso par valtri e cossita mi seitarò far. 10 Cossita come mi go la verità de Cristo, no assarò de parlar con orgòlio de questo nele region dela Acàia. 11 E parché? Sará che l’è parché no ve amo? Dio el sa che ve amo. 12 Ma mi seitarò far quel che mi fao parché quei che i va in serca de una rason par esser compagni de noantri no i gàpia la scusa par farse veder par via dela so posission. 13 Questi òmini i ze falsi apòstoli che i imbroia i altri e i fà finta de esser apòstoli de Cristo. 14 E no l’è mia de farse maraveia, parché fin Sàtana el fà finta de esser un àngelo de luce. 15 Par quela no l’è mia de restar sorpresi se anca i so servi i fà finta de esser ministri de giustìssia. Ma quel che sucederà con lori nel fin sarà de acordo cole so assion. 23 Lori i ze ministri de Cristo? Come mato mi ve digo: mi son ancora de pi. Go laorà de pi, son stato pi volte in preson, go ciapà pi bote e tante volte son restà quasi morto. 24 Dei giudèi sinque volte go ciapà 40 bote manco un, 25 tre volte go ciapà bastonade, una volta go ciapà sassade, tre volte la imbarcassion che mi ero la ga sfondà, go passà una note e un dì in meso el mar. 26 in tanti viai, in perìcoli de rii, in perìcoli de ladroni, in perìcoli del me pròpio pòpolo, in perìcoli dele nassion, in perìcoli nela cità, in perìcoli nel deserto, in perìcoli nel mar, in perìcoli in meso de falsi fradei, 27 con grando sforso e tanto laoro, tante note sensa dormir, con fame e con sen, tante volte sensa gaver de magnar, con fredo e sensa gaver cossa vestir.