Isaia

13 Par quela, cossita el dise el Sovrano Signor Geovà: “Vardé! I me servi i ndarà magnar, ma valtri ndaré patir la fame. I me servi i ndarà bever, ma valtri gavaré sen. I me servi i gavarà alegria, ma valtri saré invergognadi. 14 I me servi i ndarà osar de alegria parché i se sente ben nel cuor. Ma valtri ndaré piander par via dela tristessa che gavé nel cuor e ndaré osar parché sì drio sofrir. 16 El Dio dela verità el ndarà benedir a tuti quei nela tera che i se sforsa par ricever una benedission. Tuti quei nela tera che i fà una promessa i ndarà farla in nome del Dio dela verità. I problemi del passà i sarà desmentegadi e i sarà sconti dei me oci. 17 Parché vardé! Mi son drio crear un novo cielo e una nova tera, e le robe che ghen’era vanti no le sarà ricordade gnanca le tornarà al cuor. 18 Alora, resté felici e contenti par sempre par via de quel che son drio crear. Vardé! Mi son drio crear Gerusalen par esser un posto de alegria e quei che i ze de star lì i sarà felici. 19 Mi sarò contento con Gerusalen e restarò felice col me pòpolo. Lori no i scoltarà pi nissuni che piande o che osa de sofrimento.” 20 “No ghen sarà mia pi lì un bambin che el viva sol par pochi giorni, gnanca un vècio che no’l viva tuti i so giorni. Parché quei che ndarà morir con sento ani i sarà consideradi gióveni, e el pecator el sarà maledio, ancora che el gàpia sento ani. 21 Lori i ndarà far su case e i ndarà de star in lore. I ndarà piantar vignai e i ndarà magnar i so fruti. 22 No i ndarà far su case par i altri ndar de star, gnanca i piantarà par i altri magnar. Parché el me pòpolo el ndarà viver tanto tempo come una pianta, e i me scoliesti i ndarà goder de tuto el laoro dele so man. 23 Lori no i ndarà laorar tanto par gnente, gnanca i gavarà fioi che i ndarà sofrir calamità, parché lori e i so fioi i ze i dissendenti de quei che Geovà el ga benedio. 24 Vanti che lori i me ciame, mi risponderò; Intanto che lori i ze drio parlar, mi li scoltarò. 25 El lobo e el piegoreto i ndarà magnar insieme, el leon magnarà paia compagno el toro, e la serpente la magnarà polver. No i farà mal gnanca i farà dano in tuto el me santo monte”, el dise Geovà.