Salmi

139 Ò Geovà, ti te me esamini e me cognossi. 2 Ti te sè quando me sento do e quando me levo su. De distante ti te capissi i me pensamenti. 3 Ti te me vedi quando son drio caminar e quando me buto do. Ti te cognossi ben tuto quel che mi fao. 4 Anca vanti che ghen sìpia una parola nela me léngua, ti, ò Geovà ti belche te la sè ben. 5 Ti te sì intorno de mi, davanti e de drio, e te meti sora mi la to man. 6 La to cognossensa la ze pi granda de quel che posso capir, e tanto alta che no son bon rivarghe. 7 Ndove mi ndaria par scampar del to spìrito? E par ndove ndaria scampar dela to facia? 8 Se mi ndesse su al cielo, ti te sarissi lì. E se mi me butesse do nel Sepolcro, fin pròpio lì te sarissi ti! 9 Se mi zolesse nele ale del scomìnsio del giorno par star insieme al mar pi distante, 10 Fin lì la to man la ndaria guidarme. La to man drita la me tegneria. 11 Se mi parlesse: “Sicuro che el scuro ndarà sconderme!” Lora, la note intorno a mi la deventaria luce. 12 Gnanca el scuro el saria massa scuro par ti, e la note saria pròpio ciara come el di. Par ti, el scuro l’è compagno la luce. 13 Parché te ghè fato i me rognoni e te me ghè assà protegesto rento la pansa de me mama. 14 Mi te lodo parché mi son stà fato de maniera maraveiosa, de una maniera tanto bela. Le to òpere le ze maraveiose, Mi lo sò pròpio ben. 15 Te ghè visto i me ossi quando son stà fato nel posto pi profondo dela tera, quando ero drio cresser sensa che nissuni i lo vedesse. 16 I to oci i me ga fin visto quando ero sol un embrion. Tute le so parte le era belche scrite nel to libro. Te ghè scrito queste informassion ancora vanti che queste parte le ghen fusse. 17 Par quela, quel che te pensi l’è tanto importante par mi! Ò Dio, i to pensamenti i ze tanti! 18 Se mi proesse contarli, el so nùmero saria pi grando che i grani de areia. Quando me desmìssio, son ancora con ti. 23 Ò Dio, varda con atension rento de mi e cognossi el me cuor. Vedi come che son e cognossi le me ansietà. 24 Varda se rento de mi ghen’è robe che me mena a far el mal. E giutame ndar nela strada dela eternità.