2 Tessalonissensi

1 Paolo, Silvano, e Timòteo, ala congregassion dei tessalonissensi che la ze in union con Dio, nostro Pare, e el Signor Cristo Gesù: 2 Vui che valtri gàpie la maraveiosa bontà e la pace de Dio, el Pare, e del Signor Gesù Cristo. 3 Fradei, noantri ghemo la obrigassion de ringrassiar a Dio par valtri. L’è giusto che femo questo parché la vostra fede e el vostro amor un al altro i ze drio restar cada volta pi grandi. 4 Par quela, se stimemo tanto de valtri intrà le congregassion de Dio, parché sì drio mostrar passiensa e fede in tute le perseghission e dificoltà che sì drio infrontar. 5 Questa la ze una prova che Dio el giulga con giustìssia, e par quela valtri sì consideradi degni del Regno de Dio. E par questo Regno valtri sì drio patir. 6 Infati, l’è giusto che Dio el fae sofrir quei che i ve ga fato sofrir. 7 Ma valtri che gavé patio, riceveré alìvio insieme a noantri quando che el Signor Gesù el sarà rivelà del cielo, insieme coi so àngeli poderosi 8 in fiame de fogo, quando che lu el farà la vingansa sora quei che no i cognosse a Dio e a quei che no i obedisse ale bone notìssie del nostro Signor Gesù. 9 Questi i sarà castigadi cola destrussion eterna davanti del Signor e dela so forsa gloriosa. 10 I sarà castigadi quando che lu el vegnarà par esser glorificà coi so santi. In quel giorno tuti quei che i ga bio fede i lo lodarà, parché valtri gavé ricevesto el nostro testimónio con fede. 11 Par questo che sempre preghemo par valtri, cossita el nostro Dio el ve considerarà degni dela so ciamada, e col so poder lu el realise tuto el ben che ghe piase a lu e cada assion dela vostra fede. 12 Cossita, el nome del nostro Signor Gesù Cristo el sìpia glorificà par meso de valtri e valtri in union con lu, gràssie ala maraveiosa bontà del nostro Dio e del Signor Gesù Cristo.