Nùmeri

11 Alora el pòpolo el ga scominsià a sbrontolar tanto davanti de Geovà. Quando Geovà el ga scoltà questo, lu l’è restà tanto inrabià. E Geovà el ga mandà fogo che el ga scominsià a brusar intrà de lori e a finir fora arquanti intorno el acampamento. 2 Quando el pòpolo el ga scominsià a domandar aiuto de Moisè, lu el ga pregà a Geovà, e el fogo el se ga smorsà. 3 Par quela che i ga dato nome a quel posto de Taberà, parché Geovà el gavea mandà fogo intrà de lori. 4 Alora i stranieri che i era intrà de lori i ga scominsià a parlar dele so voie, e i israeliti i ga scominsià a piander nantra volta e a dir: “Chi che ne darà carne par magnar? 5 Ne manca tanto i pessi che magneino sensa pagar gnente nel Egito, anca cocùmeri, angùrie, àio porò, seole e àio! 6 Adesso semo drio morir. Sol vedemo questo manà.” 7 El manà l’era come la semensa de coentro e el parea resina bdèlio. 8 El pòpolo ndea fora par tor su el manà e lo smasenea nel molin o nel pestel. Dopo i lo cosinea nele pignate o i fea pan tondi. El gavea el gusto de un bolo fato con òio. 9 Quando el sguasso el vegnea do nel acampamento de note, anca el manà el vegnea do. 10 Moisè el ga scoltà che tute le fameie le piandea, cada omo ala entrada dela so tenda. Geovà l’è restà tanto inrabià e anca Moisè l’è restà tanto disgustà. 11 Alora Moisè el ga dito a Geovà: “Parché che te ghè fato el to servo sofrir? Gonti mia la to aprovassion e par quela te ghè metesto sora mi tuto el peso de questo pòpolo? 12 Son stà mi che go fato tuto questo pòpolo? Zeli me fioi, parché te me disi: ‘Portali in brasso, cossita come un servo el porta un tatin’, fin ala tera che te ghè prometesto darghe ai so antenati? 13 Ndove che vao catar carne par tuto questo pòpolo? Parché lori i seita piander davanti de mi, e i dise: ‘Dane carne par magnar!’ 14 Mi no son mia bon de soportar tuto questo pòpolo mi sol. L’è massa fadiga par mi. 15 Se te seiti tratarme cossita, alora copame. Ma se mi go la to aprovassion, no stà pi assarme veder tute queste desgràssie.” 16 Geovà el ga dito a Moisè: “Scoli par mi 70 òmini intrà i ansiani de Israel, òmini che te sè che i ze ansiani e che i ga autorità sora el pòpolo. Menali ala tenda de riunion e fali restar lì con ti. 21 Alora, Moisè el ga dito: “Mi son in meso a tuta questa gente. Lori i ze in 600.000 òmini a pié e ancora te disi: ‘Mi ghe darò carne che basta par un mese!’ 22 Se fusse copà una mùcia de piégore e de boi, sarà che ghe bastaria? O se fussi ciapà tuti i pessi del mar, sarà che ghe bastaria?” 23 Geovà el ga dito a Moisè: “Sarà che ghen’è qualcossa che la man de Geovà no la pol far? Adesso te ndaré veder se quel che go dito ndarà suceder o nò.”