Gioani

2 Due giorni dopo, ghen’è stà una festa de nosse in Canà dela Galilea, e so mare de Gesù la ze ndata. 2 Anca Gesù e i so dissìpoli i ze stati convidadi par ndar ale nosse. 3 Quando el vin l’era drio finirse, la mare de Gesù la ghe ga dito: “Lori no i ga pi vin.” 4 Ma Gesù el ghe ga dito: “E parché che questo el gavaria de importar a mi e a vu? Gnancora no l’è rivà la me ora.” 5 Alora so mare la ga dito a quei che i servia el magnar: “Fé tuto quel che lu el ve dise.” 6 De acordo cola lege dei giudei sora lavarse, lori i gavea lì sei giari par meter rento àqua. Rento de cada giaro ghe stea de 44 a 66 litri. 7 Gesù el ghe ga dito: “Impienì i giari con àqua.” E lori li ga impienidi del tuto. 8 Alora, Gesù el ga anca dito: “Adesso, ciapéghene un pochetin e portéla a quel che l’è drio tender dela festa.” E lori i ga fato pròpio cossita. 9 Quel che el tendea dela festa no’l savea de ndove el vin l’era vegnesto, ma quei che i gavea ciapà la àqua i lo savea. Quando lu el ga bevesto un poco dela àqua che la era deventada vin, lu el ga ciamà el sposo, 10 e el ghe ga dito: “Tuti i ghe dà ale persone prima el vin bon, e dopo che le ze belche ciuche, i ghe dà el rugno. Ma ti te ghè tegnesto fin adesso el vin bon.” 11 Gesù el ga fato el so primo miràcolo in Canà dela Galilea. Cossita, lu el ga mostrà la so glòria, e i so dissìpoli i ga bio fede in lu. 12 Dopo lu, so mama, i so fradei e i so dissìpoli i ze ndati do a Cafarnaun, ma no i ze restadi lì tanti giorni. 13 Manchea pochi giorni par la Pasqua dei giudei, e Gesù l’è ndato su a Gerusalen. 14 El ga catà nel témpio quei che i vendea boi, piégore e colombe, e quei che i cambiea i soldi sentadi do. 15 Alora, el ga fato una scùria con soghe, el ga mandà via tuti quei che i gavea piégore e boi del témpio, e el ga trato in tera le monede de quei che i cambiea soldi e el ga rabaltà le so tole. 16 E el ga dito a quei che i vendea le colombe: “Porté via questi laori de qua! Ferméve de far negossi nela casa de me Pare!” 17 I so dissìpoli i se ga ricordà de quel che l’è scrito: “El zelo par la to casa el brusarà rento de mi come un fogo.” 18 Alora, i giudei i ghe ga domandà: “Cossa che te pol far che prova che te ghè autorità par far queste robe?” 19 Gesù el ghe ga rispondesto: “Finì fora questo témpio, e in trè giorni mi vao tirarlo su nantra volta.” 20 Alora, i giudei i ga dito: “Questo témpio l’è stà fato su in 46 ani, e ti te ndarè tirarlo su in trè giorni?” 21 Ma lu l’era drio parlar del so corpo. 22 Magari, quando l’è stà ressussità, i so dissìpoli i se ga ricordà che lu el disea pròpio cossita, e lori i ga credesto nele Scriture e in quel che Gesù el gavea dito. 23 Intanto che l’era a Gerusalen par la Festività dela Pasqua, tanti i ga visto i miràcoli che el fea e i ga scominsià a gaver fede in lu. 24 Ma Gesù no’l se fidea del tuto de lori parché li cognossea tuti 25 e parché no ghe ocorea che nissuni ghe spieghesse gnente sora i òmini, parché el savea come che i era.