Tiago

1 Mi, Tiago, schiavo de Dio e del Signor Gesù Cristo, scrivo par le 12 tribo che le ze ndate in tanti posti: Mi ve saludo! 2 Me fradei, podé restar pròpio contenti quando infronté tanti tipi de dificoltà. 3 Parché valtri savé che, quando la vostra fede la infronta dificoltà come queste, la ve farà gaver perseveransa. 4 Ma, gavé de assar che la perseveransa la ve insegne del tuto. Cossita valtri saré completi, giusti in tute le robe e sensa sbàlio. 5 Alora, se ghe manca sabedoria a qualchedun de valtri, el ga de seitar a domandarla a Dio, parché lu ghe la dà a tuti de maniera generosa e con bontà. 6 Ma che lu el seite a domandar con fede, sensa gnanca un dùbio. Parché quel che el ga dùbio l’è come una onda del mar che el vento la fà ndar de una banda al’altra. 7 In fati, questa persona no la pol spetar ricever gnente de Geovà. 12 Felice l’è quel che el seita a far quel che l’è giusto anca cole dificoltà. Parché quando Dio lo aprova, el riceverà la corona dela vita che Geovà el ga prometesto darla a quei che i seita a amarlo. 13 Quando soto prova, che nissuni i diga: “Dio l’è drio provarme.” Parché par robe rugne Dio no’l pol esser provà, gnanca el prova nissuni. 14 Ma cada un l’è proà par esser provocà e imbroià par la so pròpia voia. 15 Alora la voia, quando la cresse, la fà nasser el pecato, e el pecato, quando l’è fato, el porta ala morte. 17 Tuti i presenti boni e perfeti i vien de sora, i vien del Pare dele luce selestiai, che no’l càmbia come una ombria. 19 Gavé questo in mente, me amadi fradei: tuti i ga de esser pronti par scoltar, ma i ga de esser lenti par parlar e lenti par restar inrabiadi. 20 Parché la ràbia del omo no la fà vegner la giustìssia de Dio. 21 Alora, assé indrio tute le robe sporche e tute le robe rugne, e aceté con brandura, che sìpia impiantada in valtri la parola che pol salvarve. 22 Alora, gavé de meter in pràtica la parola e nò sol scoltarla. No sté imbroiarve par le maniere sbaliade de pensar. 23 Parché se qualchedun el scolta la parola ma no la mete in pràtica, l’è come un omo che el varda la so fàcia nte un spècio. 24 Dopo che el se varda, el va via e suito el se desméntega de come che lu l’è. 25 Ma, quel che stùdia con atension la lege perfeta dela libertà, e seita studiarla, l’è deventà nò come quel che scolta e suito el se desméntega, ma come quel che mete in pràtica. Lu el sarà felice in quel che el fà. 26 Se qualchedun el cata che el adora a Dio ma no’l tende la so léngua, lu l’è drio imbroiar el so pròpio cuor e la so maniera de adorar no la val gnente. 27 La maniera de adorar a Dio che la ze pura e giusta par lu la ze: tender dei òrfani e dele védove nele so dificoltà e seitar distante dele robe sbaliade del mondo.