Génesi

6 Quando i òmini i ga scominsià a esser tanti nela tera e lori i ga bio fiole, 2 i fioi del vero Dio i ga visto che le fiole dei òmini le era bele. Alora i se ga maridadi con tute le done che lori i scoliea. 3 Alora, Geovà el ga dito: “El me spìrito no’l gavarà passiensa col omo par sempre, parché lu l’è sol carne. Par quela, lu el viverà 120 ani.” 4 In quei giorni e anca dopo ghen’era i nefilini nela tera. In quel tempo i fioi del vero Dio i ga seità a gaver relassion sessuai cole fiole dei òmini, e lore le ga bio fioi. Questi fioi i era i òmini poderosi e famosi dei tempi antighi. 5 Alora, Geovà el ga visto che i òmini i fea robe pròpio rugne nela tera e che nel so cuor i pensea sol sora robe rugne. 6 E Geovà el ga lamentà de gaver fato i òmini nela tera e el se ga disgustà nel cuor. 7 Par quela Geovà el ga dito: “Ndarò finir fora dela tera i òmini che mi go creà, le persone, le bèstie che le vive intrà le persone, le bèstie che le se rasta par tera e le creature che zola nel cielo, parché go lamentà de gaverli fati.” 8 Ma Noè el gavea la aprovassion de Geovà. 9 Questa la ze la stòria de Noè. Noè l’era un omo giusto. Lu el se ga mostrà sensa colpa intrà le persone del so tempo. Noè el caminea col vero Dio. 10 Noè l’è deventà pare de tre fioi: Sen, Can e Giafè. 11 El vero Dio el ga visto che le persone le era drio rovinar la tera, e la tera la era piena de violensa. 12 Quando Dio el ga vardà la tera, el ga visto che la era rovinada, parché tute le persone le fea robe rugne. 13 Dopo, Dio el ga dito a Noè: “Mi go dessidio finir fora tute le persone, parché la tera la ze piena de violensa par causa de lori. Par quela che ndarò finirli fora insieme cola tera. 14 Te ghè de far su una arca con legno che gàpia rasa. Te ghè de far division nela arca e te ghè de meter nela arca catran par rento e par fora. 15 Te ghè de farla cossita: La arca la ga de esser longa 134 metri, larga 22 metri e alta 13 metri. 16 La arca la gavarà tre andari, un soto, un in meso e nantro par sora. Te ghè de far una finestra intorno de meso metro soto el querto par sciarar la arca. Te ghè de far una porta nela banda dela arca. 17 “Mi vao mandar un dilùvio de àqua par finir fora tute le creature soto el cielo che le ga el fià dela vita. Tuto quel che ghen’è sora la tera ndarà morir. 18 Fao con ti el me acordo. E te gavarè de ndar rento la arca coi to fioi, la to dona e le done dei to fioi. 19 Te ghè de menar rento la arca due bèstie de cada tipo, el mascio e la fémena. Cossita le restarà vive insieme con ti. 20 Le creature che zola de acordo col so tipo, le bèstie che le vive intrà le persone de acordo col so tipo, le bèstie che le se rasta par tera de acordo col so tipo le ndarà rento la arca, due de cada tipo. Cossita le restarà vive. 21 E ti, te ghè de catar su e meter via tuto i tipi de magnar, par ti e par le bèstie.” 22 Noè el ga fato tuto quel che Dio lo gavea comandà far. El ga fato pròpio cossita.