Zacaria

4 El àngelo che el gavea parlà con mi l’è tornà e el me ga desmissià, come se desmissia una persona che la ze drio dormir. 2 Alora, el me ga domandà: “Cossa sito drio veder?” E mi ghe go rispondesto: “Mi son drio veder un candelabro de oro, con una scudela sora de lu. Nel candelabro ghen’è sete làmpade, si, sete. E ghen’è sete cani tacadi ale sete làmpade. 3 Dele bande del candelabro, ghen’è due oliver, un ala drita dela scudela e quel altro ala so sanca. 6 E lu el me ga dito: “Questa la ze la parola de Geovà a Zorobabel: ‘“Nò con forsa militar e gnanca con poder dei òmini, ma col me spìrito”, el dise Geovà dei esèrsiti. 7 Sito chi ti, ò grando monte? Davanti de Zorobabel te deventarè una tera piana. E lu el portarà el sasso par finir la strutura intanto che el pòpolo el osea con forsa: “Che maraveia! Che maraveia!”’” 8 Geovà el ga parlà con mi nantra volta: 9 “Le man de Zorobabel le ga fato el fondamento de questa casa e sarà le so man che le ndarà finirla. E te gavarè de saver che Geovà dei esersiti el me ga mandà a valtri. 10 Chi che ga fato de poco del giorno dele robe pìcole? Parché lori i restarà contenti e i ndarà veder el piombo nela man de Zorobabel. Questi sete i ze i oci de Geovà, che i vede tuto nela tera.” 12 Go anca domandà: “Cossa che vol dir i rami dei due oliver che le ze drio trar do el òio color de oro par meso dei due cani de oro?” 14 Lu el ga dito: “Questi i ze i due untadi che i ze in pié dela banda del Signor de tuta la tera.”