Deuteronómio

6 “Questi i ze i comandamenti, le lege e i giulgamenti che Geovà, el vostro Dio, me ga mandà insegnarve. Cossita podé obedirlo quando ndé par la tera che ndaré de star. 2 Lu el ga fato questo col ogetivo che ti, to fioi e to neti, temé a Geovà, vostro Dio, e obedì a tute le lege e comandamenti che mi ve parlo, tuti i giorni dela vostra vita. Cossita, ndaré viver tanto tempo. 3 Scolté, israeliti, e obedì del tuto, cossita quel che fé ndarà ben e deventaré tanti nela tera che vien fora late e miel, come Geovà, el Dio dei vostri antenati, el ve ga prometesto. 4 “Scolta, ò Israel: Geovà, el nostro Dio, l’è un sol Geovà. 5 Te ghè de amar a Geovà el to Dio con tuto el to cuor, con tuta la to ànima e con tuta la to forsa. 6 I comandamenti che son drio parlarte ancoi i ga de esser nel to cuor, 7 e te ghè de seitar parlar sora questi ai to fioi e te ghè de insegnargheli ai to fioi quando te sì sentà nela to casa, quando te camini par la strada, quando te te buti do e quando te te levi su. 8 Te ghè de ligarli nela man par ricordarli, e i ga de esser come una fassa ligada nel to fronte. 9 Te ghè de scriverli intorno dela porta dela to casa e nei portoni dela cità. 10 “Geovà el ga prometesto ai to antenati Abraon, Isache e Giacò che la tera la saria toa. Quando Geovà el te farà ndar rento questa tera con grande e bele cità, che ti no te le ghè fate su, 11 con case piene de tuti i tipi de robe bone che ti no te ghè mia laorar par gaverle, con possi che no te ghè mia verto, e con vignai e olivere che no te ghè mia impiantà ma te ghè magnà fin che basta, 12 stà atento par no desmentegarte de Geovà, che te ga fato vegner fora del Egito, la tera ndove te eri schiavo. 13 L’è a Geovà, el to Dio, che te ghè de rispetar del tuto, a lu che te ghè de servirlo e par el so nome che te ghè de giurar. 14 No stà adorar altri dèi, gnanca un dio dei pòpoli che i ze de star intorno a ti, 15 parché Geovà, el to Dio che l’è intrà de valtri, l’è un Dio che el vol la adorassion sol par lu. Se no te fè mia cossita, Geovà, el to Dio, el va inrabiarse contra ti e lu el va finirte fora dela tera. 24 E Geovà el ga mandà che obedìssino a tuti questi mandamenti e che gavessino profondo rispeto par Geovà, nostro Dio. Cossita tuto el ndarà ben par sempre con noantri, e podemo seitar a viver, come semo drio viver ancoi.