Mateo

4 Alora, el spìrito el ga menà Gesù nel deserto, e el Diaol lo ga provà. 2 Dopo de restar 40 giorni e 40 note sensa magnar, el ga bio fame. 3 E el Tentador l’è vegnesto e el ghe ga dito: “Se ti te sì fiol de Dio, dighe a questi sassi che i devente pan.” 4 Ma lu el ga rispondesto: “L’è scrito: ‘El omo el ga de viver nò sol de pan, ma de tute le parole che le vien dela boca de Geovà.’” 5 El Diaol lo ga menà ala cità santa e lo ga metesto nte un posto alto del témpio 6 e el ghe ga dito: “Se ti te sì fiol de Dio, trate do, parché l’è scrito: ‘Lu el darà la òrdine ai so àngeli par tenderte’ e ‘Lori i te portarà nele so man, cossita i to pié no i ndarà bater contra un sasso’.” 7 Gesù el ga dito: “Anca l’è scrito: ‘No stà meter a prova Geovà, el to Dio.’” 8 Dopo, el Diaol lo ga menà a un monte tanto alto e el ghe ga mostrà tuti i regni del mondo e la glòria de lori. 9 E el ghe ga dito: “Mi vao darte tute queste robe se te te indenoci davanti de mi e te me adori sol una volta.” 10 Alora, Gesù el ghe ga dito: “Va via, Sàtana! Parché l’è scrito: ‘Te ghè de adorar a Geovà, el to Dio, e te ghè de servir sol a lu.’” 11 Cossita, el Diaol l’è ndato via. E suito i ze vegnesti àngeli e i ga scominsià a incoraiarlo. 13 Dopo de ndar via de Nasarè, l’è ndà de star in Cafarnaun, darente del mar, nele region de Zebulon e Naftali. 14 Cossita, ga sucedesto pròpio come Isaia, el profeta, el gavea dito: 15 “Scolté, persone dele nassion che sì de star nela Galilea, la tera de Zebulon e la tera de Naftali, nela strada del mar, de quel’altra banda del rio Giordon! 16 Le persone sentade nte un bruto scuro le ga visto una granda luce. Una luce la ze vegnesta sora quei nte una region dela ombria dela morte.” 17 De quel tempo avanti, Gesù el ga scominsià a predicar e a dir: “Ciameve grami, parché el Regno del cielo l’è darente.” 18 Intanto che el caminea drio el mar dela Galilea, lu el ga visto due fradei: Simon, cognossesto come Piero, e so fradel Andrè. Lori i era drio trar una rede nel mar parché i era pescadori. 19 Gesù el ghe ga dito: “Vegné drio a mi, e mi farò che valtri sìpie pescadori de òmini.” 20 E i ga suito assà de banda le so rede e i ze ndati drio a lu. 23 Lu l’è ndato par tuta la Galilea par insegnarghe ale persone nele so sinagoghe, par predicar le bone notìssie del Regno e par curar tuti i tipi de malatie e tuti i tipi de magagne. 24 E tute le persone dela Sìria le ga sentio dir sora lu. Lore le ghe portea quei che i patia brute malatie e i gavea tanto mal, anca quei che i gavea demoni, quei che i gavea epilepsia e i desgrassiadi, e lu li ga curadi. 25 Par quela, tante persone le ghe vegnea drio. Lore le vegnea dela Galileia, de Decàpoli, de Gerusalen, dela Giudea e de quel’altra banda del rio Giordon.