Deuteronómio

2 Valtri gavé de finir fora con tuti i posti ndove le nassion, che gavé parà via, le ga adorà i so dèi, sia su nei monti, nele montagne o soto le grande piante. 3 Valtri gavé de finir fora coi so altari, spacar fora le colone de adorassion, brusar col fogo i so palanchi sacri e trar do le imàgine dei so dèi. Gavé de finir fora de quel posto i so nomi de lori. 4 “No sté adorar a Geovà, el vostro Dio, compagno lori i adora i so dèi. 5 Invesse, ndé in serca de Geovà, el vostro Dio, nel posto che lu ndarà scòlier par meter el So nome e che sarà el So posto de star intrà tute le vostre tribo. Valtri gavé de ndar là. 6 Là che gavé de portar le vostre oferte brusade, i vostri sacrifissi, le vostre dèssime parte, le contribussion dela vostra man, le oferte par causa de quel che gavé prometesto, le vostre oferte de volentiera e le prime bèstie intrà i vostri boi e le vostre piégore. 7 Valtri e quei dela vostra fameia gavé de magnar lì davanti a Geovà, el vostro Dio. Gavé de restar contenti con tuto quel che gavé fato, parché Geovà, el vostro Dio, el ve benedirà. 8 “No sté far come semo drio far qua ancoi. Tuti i ze drio far quel che ghe par giusto, 9 parché valtri no sì gnancora ndati rento el posto de riposo e nela eransa che Geovà, el vostro Dio, ve darà. 10 Quando ndaré rivar de quel’altra banda del rio Giordon e saré de star nela tera che Geovà, el vostro Dio, el ve darà, sicuro che lu el ndarà protegerve de tuti i nemighi intorno de valtri, e gavaré protession. 11 Al posto che Geovà, el vostro Dio, ndarà scòlier par meter el So nome mi ve comando de portar: le vostre oferte brusade, i vostri sacrifissi, le vostre dèssime parte, le contribussion dela vostra man e tute le oferte par causa de quel che valtri gavé prometesto a Geovà. 12 Valtri ndaré alegrarse davanti a Geovà, el vostro Dio, o sia, valtri, i vostri fioi e le vostre fiole, i vostri schiavi e schiave e i leviti che i ze nele vostre cità, parché lori no i ga una parte e gnanca una eransa intrà de valtri. 13 Stà atento de no far le to oferte brusade in qualche altro posto che no sìpia questo. 14 Te ghè de dar la to oferta brusada sol nel posto che Geovà ndarà scòlier intrà le tere dele vostre tribo, e lì te ghè de far tuto come mi te comando de far.