Ester

12 Cossita, nel giorno 13 del primo mese, i assistenti del rè i ze stati ciamadi. Lori i ga scrito tuto quel che Aman el gavea ordinà ai governadori che i laorea par el rè, a quei che i tendea dei posti che el rè el governea e ai prìnsipi de diversi posti. I ga scrito a cada posto nela maniera che lori i scrivea e nela so léngua. Le carte le ze state scrite nel nome del rè Assuero e le ze state sarade col anel dela marca del rè. 13 Le carte le ze state mandade par meso dei messageri a tuti i posti che el rè el governea. Queste carte le gavea le òrdine de rovinar, finir fora e copar tuti i giudei, gióveni e veci, done e toseti. Questo gavaria de esser fato nte un sol giorno, el giorno 13 del dèssimo secondo mese, o sia, el mese de adar. Lori i gavea anca de ciapar tuto quel che i giudei i gavea. 14 El testo cola òrdine del rè el gavaria de esser proclamà in tuti i posti che el rè el governea e i gavaria de proclamarlo a tuti i pòpoli. Cossita lori i saria pronti par quel giorno. 15 El rè el ga ordinà che i messageri i ndesse via suito. I ga proclamà questa òrdine nel palàssio de Susan. Alora, el rè e Aman i se ga sentà par bever ma ghen’era bordel nela cità de Susan.