Michea

4 Nei ùltimi giorni, el monte che la ze la casa de Geovà el sarà ben fondamentà par sora dei colmi dei monti e el sarà pi alto de quei altri monti. E le persone le ndarà fin questo monte. 2 E tante nassion le ndarà al monte e le dirà: “Vegné, ndemo su al monte de Geovà, ala casa del Dio de Giacò. Lu el ndarà insegnarne sora i so comandamenti, e noantri ndaremo viver de acordo con quel che lu el vol.” Parché la lege la vegnarà de Sion, e la parola de Geovà de Gerusalen. 3 Lu el sarà el giuis dele nassion e el ndarà indrissar quel che l’è sbalià intrà le persone dele nassion poderose. E le ga de far dele so spade làmine de arado e dele so lanse fórbese par bruscar. Lore no le alsarà la spada una contra le altre, gnanca le impararà mai pi a far la guera. 4 Le se sentarà cada una soto la so vigna e soto el so figher, sensa nissuni par spaurarle, parché Geovà dei esèrsiti el ga parlà. 5 Parché tuti i pòpoli i seghirà cada un el so dio, ma noantri seghiremo a Geovà, el nostro Dio, par sempre.