Levìtico

20 Geovà el ga dito ancora a Moisè: 2 “Te ghè de dirghe ai israeliti: ‘Se qualche israelita o straniero che l’è de star in Israel el dà un dei so dissendenti come oferta a Moloche el gavarà de esser copà a sassade. 3 Mi stesso sarò contra questo omo, vao finirlo fora del so pòpolo, parché el ga dato un dei so dissendenti come oferta a Moloche e el ga fato deventar impuro el me posto santo e el me santo nome. 4 Se qualchedun el dà un dei so dissendenti come oferta a Moloche e, invesse de coparlo, el pòpolo aposta no’l fà gnente contra lu, 5 alora son mi che ndarò contra questo omo e la so fameia. Vao finirlo fora de in meso el pòpolo insieme con tuti quei che i ze stati infedeli, parché i ga adorà a Moloche. 6 “‘Se qualchedun el va in serca de quei che i parla coi spiriti e quei che i fà indovinassion, l’è stà infedele a mi. E l’è sicuro che mi sarò contra questa persona e ndarò finirla fora del so pòpolo. 7 “Gavé de santificarve e deventar santi, parché mi son Geovà, el vostro Dio. 8 Gavé de obedir ale me lege. Mi son Geovà, che ve fao esser santi. 9 “‘Se un omo el maledisse el so pare o la so mare, el ga de esser copà. L’è par colpa soa che el sarà copà, parché el ga maledio el so pare o la so mare. 10 “‘Se un omo el fà adultèrio cola dona de nantro omo, el fà adultèrio cola dona del so pròssimo, lu el gavarà de esser copà. El omo e la dona i ga de morir. 11 Se un omo el fà relassion sessuai cola dona del so pare, questo saria una vergogna par so pare. Alora tuti due i gavarà de esser copadi. L’è par so colpa de lori che i sarà copadi. 12 Se un omo el fà relassion sessuai cola so nora, tuti due i gavarà de esser copadi. I ga fato contra quel che l’è natural. L’è par so colpa de lori che i sarà copadi. 13 “‘Se un omo el fà relassion sessuai con nantro omo, come se fà con una dona, i fà una roba pròpio bruta. Tuti due i gavarà de esser copadi. L’è par so colpa de lori che i sarà copadi. 22 “‘Gavé de obedir a tute le me lege e ai me comandamenti, cossita la tera ndove ve meno par ndar de star no la ndarà gomitarve. 23 No sté far de acordo coi costumi dele nassion che mi vao pararle via de davanti de valtri. Mi òdio tuto quel che le ga fato. 24 Par quela mi ve go dito: “Mi ve darò la so tera e la sarà vostra. La ze una tera de ndove che vien fora late e miel. Mi son Geovà, el vostro Dio, mi ve go spartio dei altri pòpoli.” 25 Gavé de far difarensa intrà la bèstia che la ze pura e impura, intrà i osei puri e impuri. No sté deventar impuri par causa dele bèstie, dei osei e dele bèstie che le se rasta par tera parché mi go dito che i ze impuri. 26 Gavé de esser santi parché mi, Geovà, son santo. Mi son drio spartirve dei altri pòpoli par farve deventar el me pòpolo. 27 “‘Gavé pròpio de copar el omo o la dona che i proa parlar coi spìriti o che i proa indovinar el futuro. Gavé de coparli a sassade. L’è par so colpa de lori che i sarà copadi.