Apocalisse

13 E el dragon l’è restà nela areia del mar. Alora go visto una bèstia cativa vegner su del mar, con diese corni e sete teste, e nei so corni ghen’era diese corone, ma nela so testa ghen’era nomi che i insultea a Dio. 2 La bèstia cativa che go visto la era compagna a un leopardo, ma i so pié i era come quei de un orso, e la so boca la era come la boca de un leon. La bèstia cativa la ga ricevesto del dragon el so poder, el so trono e la granda autorità. 3 Go visto che i ghe ga fato mal a una dele so teste e parea che no la ndaria ricuperarse, ma dopo la ze stata guarida. Tute le persone dela tera le ndea drio ala bèstia cativa e le era maraveiade. 4 Lore le adorea el dragon parché el gavea dato autorità ala bèstia cativa. Le persone le adorea ala bèstia cativa cossita: “No ghen’è nissuni compagno ala bèstia cativa! No ghen’è nissuni che pol lotar contra ela!” 7 La ga bio la permission de far guera contra i santi e vinserli. Ela la ga ricevesto autorità sora persone de cada tribo, pòpolo, léngua e nassion. 8 Tuti quei che i vive nela tera i la adorarà. Del scomìnsio del mondo, gnanca un de lori i ga bio el so nome scrito nel rolo dela vita del Piegoreto che l’è stà copà. 9 Quei che i ga récie, che i scolte. 10 Se qualchedun el ga de ndar in preson, el ndarà in preson. Se qualchedun el coparà cola spada, cola spada el sarà copà. Par quela, i santi i gavarà de ver perseveransa e fede. 11 Dopo, go visto nantra bèstia cativa vegner su dela tera; la gavea due corni compagno a quei de un piegoreto, ma la ga scominsià a parlar come un dragon. 14 Ela la ga ricevesto permission de far segnai davanti la bèstia cativa e cossita ela la imbroia le persone sora la tera. Ela la dise ale persone de far una imàgine dela bèstia cativa che la ga ciapà un colpo cola spada, ma la era ancora viva. 15 E i ghe ga permitio de dar vita ala imàgine dela bèstia cativa, parché la imàgine dela bèstia cativa la parlesse e la fesse copar tuti quei che i se ricusea de adorar la imàgine dela bèstia cativa. 16 Ela la fà che tuti, pìcoli e grandi, siori e poareti, lìberi o schiavi, i riceva una marca nela man drita o nela fronte. 17 Cossita, nissuni i pol comprar o vender, ma sol quei che i ga la marca, o sia, el nome dela bèstia cativa o el nùmero del so nome.