1 Corinti

6 Quando qualchedun de valtri el ga una discussion con un altro, come che el ga el coraio de ndar in tribunal davanti de òmini ingiusti invesse che davanti ai santi? 2 No savé che i santi i ndarà giudicar el mondo? E valtri che gavé de giudicar el mondo no sé mia boni de giudicar question poco importante? 3 Savé che noantri giudicaremo i àngeli? Alora parché no giudicaremo anca le question de questa vita? 4 Se alora gavé question de questa vita che le ga de esser giudicade, gavé de scolier come giuisi òmini che no i ga el rispeto dela congregassion? 5 Son drio dirve questo par no farve vergognar. L’è possìbile che intrà de valtri no ghen’è gnanca un omo sàbio che el sìpia bon de giudicar intrà i so fradei? 6 Invesse un fradel el va in tribunal con un fradel, e pedo ancora davanti de quei che no i crede! 7 L’è pròpio una vergogna par valtri quando ndé al tribunal un contra el altro. No saria meio sofrir ingustìssia? No saria meio sofrir un dano? 8 Invesse valtri fé ingiustìssie e ciavé, e pedo ancora ai vostri fradei! 9 No savé che i ingiusti no i guadagnarà el Regno de Dio? No sté mia farve imbroiar. Quei che i fà imoralità sessual, i idòlatri, i adùlteri, i òmini che i aceta partissipar in ati omosessuai, i òmini che i fà ati omosessuai, 10 i ladroni, quei che i vol sempre de pi, quei che i beve massa, quei che i ofende i altri, quei che i cava via soldi dei altri no i guadagnarà el Regno de Dio. 11 Questo l’è quel che arquanti de valtri eri. Ma valtri sì stati lavadi, sì stati santificadi, sì stati ciamadi giusti nel nome del Signor Gesù Cristo e col spìrito del nostro Dio. 12 Tute le cose le ze permeteste, ma no tute le ze vantaiose. Tute le cose le ze permeteste, ma mi no me farò mia controlar de gnente. 13 El magnar l’è par el stómego e el stómego l’è par el magnar, ma Dio el finirà fora tuti e due. El corpo no l’è mia par la imoralità sessual ma par el Signor, e el Signor l’è par el corpo. 14 Ma Dio el ga ressussità el Signor e el ressussitarà anca noantri col so poder. 16 Valtri no savé che quel che el va insieme con una prostituta l’è un sol corpo con ela? Parché Dio el ga dito: “I due i sarà una sol carne”. 18 Gavé de scampar via dela imoralità sessual! Tuti i altri pecati che una persona la pol far i ze fora del so corpo, ma quel che el pratica la imoralità sessual el fà un pecato contra el so pròpio corpo.