Efesi

4 Alora mi, Paolo, che son nela preson par causa del Signor, ve incoraio a viver de acordo cola ciamada che Dio el ve ga fato. 2 Par quela, gàpie sempre umiltà, brandura e passiensa, soportando un al altro con amor. 3 E sforséve del tuto par seitar unidi par via del spìrito e gaver la pace che la une. 4 Ghen’è un sol corpo e un sol spìrito, cossita come sì stati ciamadi a una sol speransa. 5 Ghen’è un sol Signor, una sol fede, un sol batésimo. 6 Ghen’è un sol Dio che l’è Pare de tuti, che l’è sora tuti e che el laora par meso de tuti e in tuti. 7 Cada un de noantri ga ricevesto la maraveiosa bontà de Dio de acordo con quel che Cristo el ne ga dato. 8 Parché le Scriture le dise: “Quando l’è ndato al cielo, el ga portà insieme schiavi. Lu el ga dato òmini come presente.” 11 Lu el ga scoliesto arquanti come apòstoli, arquanti come profeti, arquanti come predicadori dele bone notìssie, arquanti come pastori e istrutori, 12 par dar consili ai santi, par far el laoro de giutar i altri, par far pi forte el corpo de Cristo, 13 fin che saremo tuti unidi nela fede e nela cognossensa giusta sora el Fiol de Dio. Cossita, saremo persone maure e complete, compagno a Cristo. 14 Alora, no ghemo mia de esser come tosatei, che i ghe va drio a insegnamenti falsi e a òmini che i vol imbroiar, come se fùssino un barco che l’è trato de una banda al’altra par el vento. 15 Ma noantri ghemo de parlar sempre la verità e deventar cada volta pi bravi in tute le robe par via del amor, de una maniera che ghe piase a Gesù, che l’è el testa. 16 Par via de lu, tute le parte del corpo le ze unide e le laora insieme gràssie ale zonte che ghe dà al corpo quel che ghe ocore. Quando cada parte la laora polito, la assa che el corpo el cressa e che el se fae su in amor. 17 Alora, nel nome del Signor mi ve aviso de questo: no gavé pi de comportarve come che se comporta le nassion cola so maniera de pensar che no serve par gnente. 18 La so mente la ze scura e lontan dela vita che Dio el dà, parché le persone dele nassion no le vol cognosser a Dio e le ga un cuor che no’l sente pi gnente. 19 Lore no le sa pi quel che l’è sbalià. Alora, le ga un comportamento vergognoso e ghe la mete tuta par praticar tuti i tipi de robe impure. 20 Ma valtri no gavé mia imparà che el Cristo l’è cossita, 21 se valtri lo gavé pròpio scoltà e gavé imparà de lu, de acordo cola verità che la ze in Gesù. 22 Valtri sì stà insegnadi che gavé de cavarve via la vècia personalità, la vostra maniera de viver del passà, parché la ze drio finirse fora par via dele vostre voie che le ve imbroia. 23 Valtri gavé de seitar a far nova la vostra maniera de pensar 24 e gavé de meter su la nova personalità, che la ze stata creada de acordo cola volontà de Dio, con vera giustìssia e lealtà. 25 Alora, adesso che gavé cavà via de valtri la falsità, gavé de dir la verità ale persone, parché noantri semo parte del medèsimo corpo. 26 Anca se resté inrabiadi, no sté pecar. El sol no’l ga de ndar do intanto che valtri sì ancora inrabiadi. 27 No sté dar oportunità al Diaol. 28 Quel che el roba, che no’l robe pi. Pitosto el ga de far sforso e laorar de maniera onesta cole so man. Cossita el pol gaver qualcossa par spartir con qualchedun che el ga de bisogno. 29 No ga de vegner fora dela vostra boca gnanca una parola rugna, ma sol parole bone che tira su i altri quando i ga de bisogno e che le fà ben a quei che le scolta. 30 E no sté far el spìrito santo de Dio restar triste, parché l’è stà con questo spìrito che Dio el ve ga scoliesto par un giorno che saré lìberi par meso del risgate. 31 Gavé de cavar via de rento tuto el rancor, la ràbia, el furor, el osar, el parlar che ofende, insieme con tuta la cativeria. 32 Ma sìpie bondosi un coi altri, e dimostré afeto e compassion. Gavé de perdonarve un al altro del tuto, cossita come Dio el ve ga perdonà del tuto par meso de Cristo.