Génesi

39 I ismaeliti i ga portà Giusepe al Egito. Lì lo ga vendesto a un egìpsio ciamà Potifar. Potifar l’era paron dela guarda e un omo importante nel palàssio del Faraò. 2 Ma Geovà l’era con Giusepe. Par quela, tuto quel che el fea ndea ben e lu l’è stà metesto par tender dela casa del so paron, el egìpsio. 3 E el so paron el ga visto che Geovà l’era con Giusepe e che Geovà el fea che tuto quel che el fea ndesse ben. 4 El so paron ghe volea tanto ben e lo ga scoliesto come quel che lo giutea. Alora, Potifar el ga scoliesto Giusepe par tender dela so casa e de tuto quel che lu el gavea. 5 Dopo che el egìpsio lo ga scoliesto par tender dela so casa e de tuto quel che lu el gavea, Geovà el ga benedio la casa del egìpsio par causa de Giusepe. Geovà l’era drio benedir tuto quel che ghen’era nela casa e nel campo del so paron. 6 Dopo, Potifar el ga dato a Giusepe el laoro de tender de tuto quel che lu el gavea. Lu no’l se preocupea con gnente, sol con quel che el gavea de magnar. E Giusepe l’è deventà bel e forte. 7 Dopo de un tempo, la dona del so paron la ga scominsià a vardar Giusepe e a dirghe: “Bùtete do con mi!” 8 Ma lu no’l volea farlo e el ghe disea: “Varda, el me paron no’l se preocupa con gnente de questa casa. El me ga dito de tender de tuto quel che el ga. 9 No ghen’è nantra persona che la ga de pi autorità che mi in questa casa e la ùnica roba che el me ga proibio la ze ti, parché te sì la so dona. Alora, come che mi podaria far una bruta roba cossita e far un pecato contra Dio?” 10 Ancora che la seitea a parlarghe tuti i di, Giusepe no’l ga mai volesto butarse do con ela gnanca restar insieme a ela. 11 Ma nte un giorno lu l’è ndato rento la casa par far el so laoro e no ghen’era gnanca un servo dela casa lì. 12 Alora, ela lo ga ciapà par la roba e la ghe ga dito: “Bùtete do con mi!” Ma lu el ga scampà via e el ga assà la roba nele so man. 13 Quando ela la ga visto che lu el gavea assà la roba nele so man e che el gavea scampà via, 14 la ga scominsià a osar e la ga ciamà i òmini dela casa. La disea: “Vardé sol! El me omo el ga menà qua rento casa questo ebreo che el vol far che i altri i ne rida drio. L’è vegnesto qua in serca de butarse do con mi, ma mi go scominisià a osar con tute le forse che gavea. 15 E quando el me ga scoltà osar, lu el ga assà la so roba qua e el ga scampà via.” 20 Alora, el paron de Giusepe lo ga ciapà e lo ga metesto in preson, ndove che i metea tuti i prisioneri del rè, e Giusepe l’è restà lì nela preson. 21 Ma Geovà el seitea con Giusepe, el ghe dimostrea amor leal e el fea che el gavesse la aprovassion del paron dela preson. 22 Alora, el paron dela preson el ga mandà Giusepe tender de tuti i prisioneri che ghen’era nela preson. Giusepe el comandea tuto el laoro che se fea lì. 23 El paron dela preson no’l se preocupea pròpio con gnente de quel che Giusepe el gavea de tender, parché Geovà l’era con Giusepe e Geovà el fea che ndesse ben tuto quel che Giusepe el fea.