Génesi

45 Dopo de questo, Giusepe no l’è stà pi bon de tegnerse davanti dei so servi. Cossita, lu el ga osà: “Mandé tuti via de qua!” No l’è restà pi nissuni con Giusepe quando lu el se ga fato cognosser ai so fradei. 2 Alora lu el se ga tacà a piander tanto alto che i egìpsi i lo ga scoltà e i lo ga sentio fin dela casa de Faraò. 3 E nel fin, Giusepe el ga dito ai so fradei: “Mi son Giusepe. E me pare, elo ancora vivo?” Ma i so fradei no i ze stati boni de risponderghe gnente parché no i era gnanca boni de creder. 4 Alora Giusepe el ga dito ai so fradei: “Rivé darente, par piaser.” E lori i ze rivadi darente de lu. Lu el ghe ga dito: “Mi son Giusepe, el vostro fradel, che valtri gavé vendesto ai egìpsi. 5 Ma, adesso, no sté restar disgustadi e no sté colparve un al altro parché me gavé vendesto ai egìpsi, parché Dio el me ga mandà vanti de valtri par salvar vite. 6 Questo l’è el secondo ano de fame nel paese, e ancora gavaremo altri sinque ani che no ndaremo mia piantar gnanca tor su gnente. 7 Ma Dio el me ga mandà vanti de valtri par far restar qualchedun de valtri nela tera e par salvar la vostra vita par meso de una granda liberassion. 8 Cossita, no sì mia stà valtri che me gavé mandà par de qua, ma l’è stà el vero Dio che el me ga mandà par farme el prinsipal consiliero del Faraò, signor dela so casa e governador de tuta la tera del Egito. 9 “Torné svelti al me pare e gavé de dirghe: ‘To fiol Giusepe el dise cossita: “Dio el me ga fato paron de tuto el Egito. Vu, vegné a mi, no sté tardigar. 10 Vu ndaré de star nela tera de Gòsen. Lì, vu saré darente de mi, dei vostri fioi, dei vostri neti, dele vostre piégore, dei vostri boi e de tuto quel che vu gavé. 11 Lì, mi ve darò de magnar, parché ghen sarà ancora sinque ani de fame. Senò, vu, la vostra casa e tuto quel che vu gavé ndarà finirse nela misèria.”’ 12 Valtri e el me fradel Bengiamin podé veder adesso coi vostri propi oci che son mi pròpio che son drio parlar con valtri. 13 Cossita, conté al me pare tuta la glòria che go qua nel Egito e tuto quel che gavé visto. Adesso, ndé svelti e portéme in qua el me pare.” 14 Alora lu el ghe ga dato un strucon a so fradel Bengiamin e el se ga tacà a piander. E Bengiamin el ga piandesto intanto che el ghe dea un strucon. 15 Lu el ga basà tuti i so fradei e el ga piandesto intanto che el ghe dea un strucon a lori. Dopo de questo i so fradei i ga parlà con lu.