1 Timòteo

2 Alora, prima de tuto, domando a tuti de far orassion par suplicar, par domandar el aiuto de Dio e par dir gràssie in favor de tuti i tipi de persone, 2 dei rè e de tuti quei che i ga autorità. Cossita, podemo seitar a viver una vita calma e tranquila, e a servir a Dio pròpio come ghe piase a lu. 3 Questo l’è bel e el ghe piase a Dio, el nostro Salvador, 4 che el vol che tuti i tipi de persone i sìpie salvi e i gàpie la cognossensa giusta dela verità. 5 Parché ghen’è sol un Dio, e sol un mediador intrà Dio e i òmini: un omo, Cristo Gesù, 6 che el ga dato la so vita come risgate par tuti. Nel tempo giusto el sarà dato testimònio sora questo. 7 Mi son stà designà par questo propòsito, come predicador e apòstolo — mi parlo la verità, son mia un busier — istrutor dele nassion sora la fede e la verità. 8 Mi vui che lori i seite a pregar, i leve su le man leai, sensa ràbia e discussion. 9 Cossita, le done le ga de vestirse cole robe apropiade, de maniera modesta e con bon giudìssio, nò col stilo dele transe, gnanca col oro o pèrole gnanca cole robe de tanto valor, 10 ma de maniera pròpia dele done che le dise che adora a Dio, o sia, con bone òpere. 11 Che le done le impare in silènsio con tuta la submission. 12 Mi no asso mia che la dona la insegne o la gàpia autorità sora el omo, ma la ga de restar in silènsio. 13 Parché Adon lè stà fato prima de Eva. 14 Anca, Adon l’è mia stà imbroià, ma la dona la ze stata imbroiada del tuto e la ga pecà. 15 Ma, ela la sarà salva deventando mare, se la seita nela fede, nel amor e nela santità, con bon senso.