2 Corinti

3 Ghemo de bisogno de mostrarve nantra volta chi che noantri semo? O come arquanti, ghemo bisogno de carte de valtri o par valtri che le parla sora noantri? 2 Valtri sì la nostra carta, scrita nel nostro cuor, che tuti la cognosse e la lede. 3 Se pol veder che valtri sì una carta de Cristo che noantri, che servimo a Dio, ghemo scrito. Questa carta la ze scrita nò cola tinta, ma col spìrito del Dio che el vive e nò sora tole de sasso, ma sora tole fate de carne, scrita sora el nostro cuor. 4 Questa la ze la confiansa che ghemo in Dio par meso de Cristo. 5 No ghemo questa capassità par far questa òpera par meso de noantri stessi, ma l’è Dio che el ne dà la capassità, 6 Lu el ne ga capassità par esser servi de un novo acordo, nò servi de una lege scrita ma del spìrito. Parché la lege scrita la condana ala morte, ma el spìrito el dà la vita. 7 Se la lege che la porta ala morte e che la ze stata scrita in tole de piera la ze vegnesta con tanta glòria che i fioi de Israel no i era boni de vardar la fàcia de Moisè par causa dela glòria che la slusea dela so fàcia, glòria che la gavea de esser finida fora, 8 no sarà ancora pi gloriosa la distribussion del spìrito? 9 Se la lege che la condana le persone la era gloriosa, quanto de pi gloriosa la ga de esser la distribussion dela giustìssia! 10 Infati, fin quel che l’è stà glorioso una volta el ga perso la so glòria par causa de una glòria superior. 11 Se alora quel che el gavea de esser finio fora l’è stà presentà con glòria, quanto de pi granda la sarà la glòria de quel che el resta! 12 Come che ghemo questa speransa, parlemo con libertà de parola, 13 e no femo compagno de Moisè, che el se ga metesto un velo nela fàcia parché i fioi de Israel no i vedesse la fin de quel che gavea de esser finio fora. 14 Ma le so mente le era insensìbile. Fin ancoi, quando se lede el vècio acordo, lori i seita con questo medèsimo velo, parché l’è sol par meso de Cristo che l’è cavà via. 15 Infati, fin ancoi quando se lede Moisè, ghen’è un velo nel so cuor. 16 Ma quando qualchedun el ritorna a Geovà, el velo l’è cavà via. 17 Geovà l’è el Spìrito, e ndove ghen’è el spìrito de Geovà, ghen’è libertà. 18 Nostra fàcia no la ze querta e la mostra la glòria de Geovà come se fusse speci. Questa glòria la slusa cada volta de pi e deventemo sempre de pi compagno a Geovà, par via del so spìrito.