Deuteronómio

22 “Se te vedi la piégora o el toro del to fradel perso par strada, no stà far finta che no te ghè visto gnente. Te ghè de menar indrio la bèstia al to fradel. 2 Ma se el to fradel no l’è de star darente de ti, o ti no te lo cognossi, te ghè de menar casa la bèstia e la ga de restar lì con ti fin che el to fradel el vegna torla. Alora, te gavarè de darghela indrio. 3 Te ghè de far la medèsima roba se te vedi el mul, una roba de vestir o qualcossa che el to fradel el gàpia perso e te la ghè catada. No stà far finta che no te ghè visto gnente. 4 “Se te vedi el mul o el toro del to fradel cascar nela strada, no stà far finta che no te lo ghè visto. Te ghè de giutar a alsarlo su. 5 “Una dona no la ga de vestirse come un omo, gnanca un omo el ga de vestirse come una dona. Parché Geovà el òdia quei che i fà questo. 6 “Se te cati nela strada un gnaro de osei coi oseleti rento o coi ovi, se l’è su nte una pianta o par tera, e la mama la ze sora i oseleti o i ovi, no stà ciapar la mama insieme coi oseleti. 7 Assa che la mama la vae via, ma te pol ciapar i oseleti par ti. Cossita, tuto ndarà ben con ti e te viverè par tanto tempo. 8 “Quando te fè su una casa nova, te toca far anca un parapeto par la to terassa, cossita ti no te ndarè meter la colpa de sangue sora la to casa, se qualchedun el casca do. 9 “No stà impiantar nel to vignal altro tipo de semensa. Senò, tuto quel che vien su de quel che te ghè semenà e tuto quel che vien del to vignal no’l sarà pi tuo ma del santuàrio. 10 “No stà meter un toro e un mul soto la medèsima canga par tirar el arado.