Romani

13 Tuti i ga de star soto le autorità superior, parché no ghen’è autorità che no la vien de Dio. L’è Dio che el ga metesto queste autorità nele so posission. 2 Alora, quel che el se mete contra la autorità el se mete contra la òrdine de Dio. Quei che i se mete contra lu i sarà condanadi. 3 Par quela che quei che i fà polito no i ga mia paura dei governanti, ma quei che i fà el mal i ga paura de lori. Vuto esser lìbero dela paura dela autorità? Seita far el ben e ela la te lodarà, 4 parché ela la ze al servìssio de Dio par el to ben. Ma se te fè el mal, te toca gaver paura, parché no l’è par gnente che ela la porta la spada. La ze al servìssio de Dio par castigar chi che el fà el mal. 5 Par quela che ghemo de star soto la autorità, nò sol par paura de esser castigadi, ma anca par via dela vostra cossiensa. 6 L’è par quela anca che valtri paghé le tasse, parché le autorità le ze al servìssio de Dio par el ben dele persone e le fà questo tuto el tempo. 7 Gavé de dar a queste autorità quel che le mèrita: paghé le tasse a quei che i domanda le tasse, rispeté quei che i domanda rispeto e deghe onor a quei che i domanda onor. 8 No sté mia gaver dèbiti con nissun, ma gavé de amarve un al altro, parché quel che ama el so pròssimo el obedisse ala lege. 9 La Lege la dise de no far adultèrio, de no copar, de no ciavar e de no voler quel che l’è dei altri. Ma questi e anca i altri comandamenti i se pol dir con queste parole: “Te ghè de amar el to pròssimo come ti stesso”. 10 Quel che mostra amor no’l fà mal al so pròssimo. Par quela che amar vol dir obedir a tuta la lege. 11 Gavé de far queste robe par via dei tempi che vivemo: l’è romai ora che ve desmissié del sono parché la nostra salvassion la ze pi darente de quando che gavé acetà la verità. 12 La note la ze drio finir e el di l’è romai darente. Par quela assemo de banda le òpere che le ze del scuro e metemo su la armadura dela luce. 13 Ghemo de comportarse ben, come se fussi di, sensa feste sensa lìmiti gnanca bever massa, sensa far imoralità sessual gnanca comportamenti sensa vergogna, sensa barufe e gelosie. 14 Ma vestive del Signor Gesù Cristo e no sté mia pensar come far le vostre voie dela carne.