Ageo

2 Nel di 21 del sètimo mese, la parola de Geovà la ze vegnesta par meso del profeta Ageo: 2 “Par favor, domàndaghe al governador de Giudà, Zorobabel, fiol de Sealtiel, al prinsipal sasserdote Giosuè, fiol de Geosadache, e a quei altri del pòpolo: 3 ‘Ghen’elo qualchedun intrà de valtri che el ga visto la glòria de la prima casa? E come che la vedé ancoi? In comparassion cola prima casa, no caté che la ze someiante a gnente?’ 4 “‘Ma adesso, sìpia forte, Zorobabel, e sìpia forte, Giosuè, prinsipal sasserdote, fiol de Geosadache’, el dise Geovà. “‘E tuti valtri che vivé in questa tera sìpie forti e laoré’, el dise Geovà. Geovà dei esèrsiti el dise: “‘Parché mi son con valtri. 5 Ricordeve de quel che mi ve go prometesto quando sì vegnesti via del Egito. E ricordeve de che el me spìrito el continua intrà de valtri. No sté gaver paura.’” 6 “Parché cossita el dise Geovà dei esèrsiti: ‘Nantra volta, in poco tempo, vao sgorlar el cielo, la tera, el mar e la tera seca.’ 7 “‘Vao sgorlar tute le nassion e le cose pressiose de tute le nassion le va ndar rento dela me casa. Vao impienir questa casa de glòria’, el dise Geovà dei esèrsiti. 8 “‘El argento l’è mio e el oro l’è mio’, el dise Geovà dei esèrsiti. 9 “‘La glòria de questa casa la sarà pi granda che la prima’, el dise Geovà dei esèrsiti. “‘E vao stabilir la pace in questo posto’, el dise Geovà dei esèrsiti.” 20 Nel giorno 24 del mese, Geovà el ga parlà nantra volta con Ageo: 21 “Parla a Zorobabel, governador de Giudà: ‘Vao far sgorlar el cielo e la tera. 22 Vao finir fora coi troni dei governanti e con el so poder. Vao finir cole carete de guera e quei che le dopera. Anca i cavai e i so cavaleri i ndarà morir. Intrà de lori i ndarà coparse cole so spade.’”