Mateo

2 Dopo che Gesù l’è nassesto in Belen dela Giudea, quando el rè Erode l’era drio governar, astròloghi vegnesti del Leste i ze rivadi in Gerusalen. 2 Lori i disea: “Ndove elo quel che l’è nassesto par esser rè dei giudei? Parché ghemo visto la so stela quando che èrino nel Leste e semo vegnesti par lodarlo.” 3 Quando el rè Erode el ga sentio questo, l’è restà preocupà e anca tuta la cità de Gerusalen. 4 Alora, Erode el ga mandà ciamar tuti i prinsipai sasserdoti e tuti quei che i insegnea la Lege, e el ghe ga domandà ndove el Cristo el gavaria de nasser. 5 Lori i ghe ga rispondesto: “In Belen dela Giudea, parché el profeta el ga scrito cossita: 6 ‘E ti, Belen dela tera de Giudà, sicuro che no te sì la cità manco importante intrà i governadori de Giudà, parché de ti vegnarà fora un governante che el sarà come pastor par el me pòpolo, Israel.’” 7 Alora Erode, sconto dei altri, el ga ciamà i astròloghi parché el volea saver el tempo giusto che la stela la gavea spontà. 8 Quando li ga mandadi a Belen, lu el ghe ga dito: “Ndé in serca del toseto par tute le bande e, quando lo caté, diseme. Cossita anca mi posso ndar là par lodarlo.” 9 Dopo che i ga scoltà el rè, i òmini i ze partidi. La stela che i gavea visto quando i era nel Leste la ndea davanti de lori fin che la se ga fermà sora el posto ndove l’era el toseto. 10 Quando i ga visto che la stela la se ga fermà, i ze restadi tanto contenti. 11 E quando i ze ndati rento la casa, i ga visto el toseto cola so mare, Maria, e i se ga indenocià par lodarlo. I ga verto i so tesori e i ghe ga dato oro, insenso e mira al toseto. 12 Ma, Dio el ghe ga fato insognarse che lori no i gavaria de tornar indrio fin Erode. Alora, i ze tornadi al so paese par una strada difarente. 13 Dopo che i ze partidi, el àngelo de Geovà el ga parlà a Giusepe nte un insogno. Lu el ga dito: “Leva su, ciapa el toseto e la so mama del toseto e scampa via al Egito. Resta lì fin che te mando dir, parché Erode el ndarà in serca del toseto par coparlo.” 14 Par quela, Giusepe el se ga levà su de note, el ga ciapà el toseto e la so mama, e i ze ndati al Egito. 15 Lu l’è restà là fin la morte de Erode. Cossita se ga realisà quel che Geovà el gavea dito par meso del profeta: “Del Egito go ciamà el me fiol.” 16 Erode el se ga nicorto che i astròloghi i lo gavea imbroià. Alora, lu l’è restà pròpio cativo e el ga mandà copar, in Belen e nele cità intorno, tuti i toseti de manco de due ani. Lu lo ga fato de acordo col tempo che i astròloghi i ghe gavea dito che la stela la gavea spontà. 17 Cossita se ga realisà quel che el profeta Geremia el ga dito: 18 “In Ramà se ga sentio una voce de qualchedun che piandea e l’era tanto triste. L’era Rachel che la piandea par causa dei so fioi. Ela no la volea che nissuni i la consolesse parché i so fioi i era stati copadi.” 19 Dopo che Erode l’è morto, intanto che Giusepe l’era nel Egito, el àngelo de Geovà el ghe ga parlà nte un insogno: 20 “Leva su, ciapa el bambin e la so mama e torna a Israel, parché quei che i volea copar el bambin i ze belche morti.” 21 Alora, lu el se ga levà su, el ga ciapà el toseto e la so mama, e i ze tornadi a Israel. 22 Ma quando Giusepe el ga sentio che Archelau el governea nela Giudea, nel posto de so pare, Erode, el ga bio paura de ndar là. Giusepe l’è stà anca avisà par meso de un insogno, par quela, l’è ndà a Galilea. 23 E lu l’è ndato de star nte una cità de nome Nasarè. Cossita, ga sucedesto pròpio come i profeti i gavea dito: “Lu el sarà ciamà Nasareno.”