Romani

4 Alora, cossa che podemo dir sora cossa che Abraon, el nostro antenato el ga ricevesto? 2 Par esémpio, se Abraon l’è stà considerà giusto par meso dele robe che lu el ga fato, lu el podaria farse veder, ma nò davanti de Dio. 3 Ma cossa che la Scritura la dise? “Abraon el ga bio fede in Geovà, e par quela lu l’è stà considerà giusto.” 4 El pagamento de quel che el laora no l’è considerà un presente, ma l’è un dirito. 5 Invesse, el omo che no’l fà òpere, ma el ga fede in quel che el ciama de rugna una persona giusta, lu l’è considerà giusto par via dela so fede. 6 Cossita anca Davi el parla dela felicità del omo che Dio el considera giusto, no importa quale che sìpia le so òpere: 7 “Felici i ze quei che i ze stati perdonadi dele so òpere rugne e che i ghe ga perdonà i so pecati; 8 Felice l’è el omo che Geovà no’l ghe bada i so pecati.” 9 Questa felicità la ze par quei che i ga fato la sirconsision o la ze anca par quei che no i ga fato la sirconsision? Parché noantri disemo: ”Abraon l’è stà considerà giusto par via dela so fede.” 10 Quando che l’è stà considerà giusto? Quando l’era sirconsidà o quando no l’era? Lu no l’era ancora sirconsidà, ma l’era nò sirconsidà. 11 E lu el ga ricevesto un segnal, o sia, la sirconsision, come garansia dela giustìssia in resultà dela fede che lu el gavea intanto che no l’era mia sirconsidà, parché lu el fusse el pare de tuti quei che no i ga fato la sirconsision e che i ga fede, col ogetivo de considerarli giusti; 12 anca parché Abraon el fusse el pare de tuti i dissendenti che i ga fato la sirconsision: nò sol de quei che i fà la sirconsision, ma anca de quei che i fà compagno la fede che Abraon el gavea quando lu no l’era ancora sirconsidà. 13 Dio el ga prometesto a Abraon e ai so dissendenti che lori i ndaria ereditar el mondo, nò parché lu el ga obedio ala lege, ma parché l’è stà considerà giusto par via dela so fede. 14 Se quei che i pràtica la lege i ze quei che i va ricever quel che Dio el ga prometesto, no ghen saria bisogno dela fede e la promessa la saria sensa valor. 15 In verità, la Lege la fà inrabiar Dio; ma ndove che no ghen’è la lege, no ghen’è pecato. 18 Ancora che parea che no saria mia possìbile, par via dela speransa, Abraon el ga bio fede che el ndaria deventar pare de tante nassion, de acordo con quel che l’è stà dito: “La to dissendensa la sarà granda.” 19 Quando el vedea el so corpo, el savea che romai l’era vècio (parché el gavea darente de 100 ani) e anca Sara no la era mia bona de gaver fioi. Ancora cossita, la so fede no la ze restada manco forte. 20 Ma par causa dela promessa de Dio, lu el ga bio fede e no’l ga bio dubi. Invesse, la so fede lo ga fato poderoso e el ga dato glòria a Dio. 21 Lu l’era sicuro del tuto che Dio el saria bon de far tuto quel che el ghe gavea prometesto.