Ageo

1 Nel secondo ano del rè Dario, nel sesto mese, nel primo giorno del mese, el governador de Giudà, Zorobabel, fiol de Sealtiel, e el prinsipal sasserdote Giosuè, fiol de Geosadache, i ga ricevesto par meso del profeta Ageo questa parola de Geovà: 2 “Geovà dei esèrsiti el dise cossita: ‘Questo pòpolo el dise: “Gnancora no’l è rivà el tempo par far su la casa de Geovà.”’” 3 Alora, la parola de Geovà la ze vegnesta nantra volta par meso del profeta Ageo: 4 “Elo questo el tempo par valtri esser de star nele vostre case forade con bele tole, intanto che la me casa la seita in rovine? 5 Adesso, cossita el dise Geovà dei esèrsiti: ’Sté atenti a quel che valtri sì drio far. 6 Valtri semené tante semense, ma le vostre racolte le ze pìcole. Valtri magné, ma no resté cola pansa piena. Valtri bevé, ma resté ancora con sen. Valtri meté su le robe, ma no ve scaldé. Quel che laora el mete via el so salàrio nte un saco sbuso.’” 7 “Cossita el dise Geovà dei esèrsiti: ‘Sté atenti a quel che valtri sì drio far.’ 8 “‘Ndé su ala montagna e porté do tole. Fé su la casa, par mi gaver piaser in ela e par mi esser glorificà’, el dise Geovà.” 9 “Geovà dei esèrsiti el dise: ’Valtri gavé spetà tanto dele racolte ma gavé tolto su poco. E, quando gavé portà questo poco rento de casa, mi lo go spalià col me fià. Parché? Parché la me casa la ze rovinada, intanto che cada un de valtri sì drio tender dela vostra pròpria casa. 10 Par quela, el cielo sora valtri no’l ga molà do el so sguasso, e la tera no la ga dato la so produssion. 11 E mi go fato vegner una seca sora la tera, sora i monti, sora i grani, sora el vin novo, sora el òio, sora le produssion dela tera, sora i umani, sora le bèstie e sora tuto el laoro dele vostre man.’”