Esdra

3 Quando l’è rivà el sètimo mese e i israeliti i era bèlche nele so cità, lori i se ga riunio tuti intesi in Gerusalen. 2 Gesua, fiol de Geosadache, e i sasserdoti che i laorea con lu, e anca Zorobabel, fiol de Sealtiel, e i so fradei, i ga scominsià a far su el altar del Dio de Israel, par che i podesse far i sacrifissi brusadi come oferte sora lu, de acordo cola Lege de Moisè, el omo del vero Dio. 3 Se anca i gavesse paura dei pòpoli intorno de lori, i ga fato su el altar ndove che l’era vanti e i ga scominsià a ofertar sora lu i sacrifissi brusadi a Geovà, i sacrifissi dela matina e dela sera. 4 Alora lori i ga fato la selebrassion dela Festività dele Tende de acordo con quel che l’era scrito. E lori i ga ofertà tuti giorni i sacrifissi che ghe volea par cada giorno. 5 Dopo i ga ofertà le oferte brusade che ghe volea, le oferte dele lune nove e le oferte de tute le feste sacre de Geovà, insieme coi sacrifissi che le persone le portea de tuto el cuor come oferte a Geovà. 6 Lori i ga scominsià a ofertar i sacrifissi brusadi a Geovà nel primo giorno del sètimo mese, anca se no i gavesse metesto el fondamento del témpio de Geovà. 10 Quando i costrutori i ga scominsià a far el fondamento del témpio de Geovà, i sasserdoti vestidi cole so robe de laorar nel témpio i portea le so trombete, e i leviti, fioi de Asafe, i portea i so piati sonanti. Lori i ze levadi su in pié par lodar a Geovà de acordo cole orientassion de Davi, rè de Israel. 11 E i ga scominsià a cantar un dopo l’altro par lodar e ringrassiar a Geovà: “Parché lu l’è bon e el so amor leal el dura par sempre.” Alora el pòpolo el ga osà ben alto in lode a Geovà parché i ga metesto el fondamento dela casa de Geovà. 12 Tanti dei sasserdoti, dei leviti e dei paroni dele fameie, quei pi vèci che i gavea visto la casa che ghen’era vanti, i ga piandesto alto quando i ga visto scominsiar el fondamento de questa casa. E tanti altri i osea de alegria con tuta la so voce. 13 Cossita, nissuni i era boni de far difarensa intrà el bordel de quei che i osea de alegria e de quei che i piandea. El pòpolo el osea tanto alto che se podea scoltar el bordel de distante.