Giò

1 Nela de tera de Uz, ghen’era un omo de nome Giò. Lu l’era un omo sensa colpa e giusto. Lu el gavea profondo rispeto par Dio e el stea distante de quel che l’era sbalià. 6 L’è rivà el giorno che i fioi del vero Dio i ze ndati davanti a Geovà, e anca Sàtana l’è ndato insieme de lori. 7 Alora Geovà el ga domandà a Sàtana: “De ndove sito vegnesto?” Sàtana el ga rispondesto a Geovà: “Mi ero drio caminar in volta par la tera.” 8 E Geovà el ga dito a Sàtana: “Gheto visto el me servo Giò? No ghen’è nissuni compagno de lu nela tera. Lu l’è un omo sensa colpa e giusto, che teme a Dio e che el stà distante dele robe rugne.” 9 Alora Sàtana el ga rispondesto a Geovà: “L’è par gnente che Giò teme a Dio? 10 No te ghè metesto un muro de protession intorno de lu, intorno dela so casa e intorno de tute le robe che lu el ga? Te ghè benedio el laoro dele so man e le so bèstie le se ga spaià nela tera. 11 Ma adesso, mete la to man sora tuto quel che el ga, e sicuro che el te maledirà nela to fàcia.” 12 Alora Geovà el ga dito a Sàtana: “Eco! Te pol far quel che te vol con tuto quel che el ga. Ma no stà mia tocarlo. Alora Sàtana l’è ndato via de davanti de Geovà. 13 Dopo, nel giorno che i fioi e le fiole de Giò i era drio magnar e bever vin nela casa de so fradel pi vècio, 14 l’è rivà una persona con un messàgio e la ga dito a Giò: “I boi i era drio arar, e le musse le era drio magnar erba darente de lori. 15 Alora, i sabei i ze vegnesti e li ga portadi via, e i ga copà i servi cola spada. Sol mi son restà vivo par contarte.” 16 Intanto che el parlea, l’è rivà nantro e el ga dito: “Dio el ga mandà fogo del cielo e el ga brusà le piégore e i servi. Sol mi son restà vivo par contarte.” 17 Intanto che lu el parlea, l’è rivà ancora nantro e el ga dito: “I caldei i ze rivadi in tre grupi e i ga portà via i cameli, e i ga anca copà i servi cola spada. Sol mi son restà vivo par contarte.” 18 Intanto che lu el parlea, l’è rivà ancora nantro e el ga dito: “I to fioi e le to fiole i era drio magnar e bever vin nela casa de so fradel pi vècio. 19 De colpo, l’è vegnesto un forte vento del deserto e el ga trato do i quatro cantoni dela casa. Cossita, la casa la ze cascada sora i gióveni e lori i ze morti. Sol mi son restà vivo par contarte.” 20 Alora, Giò el se ga levà su, el ga sbregà le so robe e el rapà la testa. Dopo, el se ga trato in tera, e cola fàcia in tera, 21 el ga dito: “Nudo son nassesto de me mama, e nudo tornarò. Geovà el me ga dato e Geovà el me ga portà via. Che el nome de Geovà el seite a esser lodà.” 22 In tuto questo, Giò no’l ga pecà e gnanca el ga acusà Dio de far qualcossa de sbalià.