1 Corinti

1 Mi, Paolo, ciamà par esser apòstolo de Cristo Gesù par volontà de Dio, e nostro fradel Sòstene 2 scrivemo ala congregassion de Dio che la ze in Corinto, a valtri che sì stati santificadi come dissìpoli de Cristo Gesù. Sì stati ciamadi par esser santi, insieme a tuti quei che in tute le bande i ciama el nome del nostro Signor Gesù Cristo. Lu l’è el so Signor e el nostro. 3 Podé gaver la maraveiosa bontà e la pace de Dio, che l’è nostro Pare, e del Signor Gesù Cristo. 4 Mi sempre ringràssio a Dio par via dela maraveiosa bontà che el ve ga mostrà par meso de Cristo Gesù. 5 Valtri sì stati tanto benedidi parché sì unidi con lu, e gavé ricevesto tuta la capassità de parlar e tuta la cognossensa. 6 Par quela, el testimònio sora el Cristo l’è stà fato ben firme intrà de valtri 7 e cossita no ve manca gnanca un don de Dio intanto che speté premosi che el nostro Signor Gesù Cristo el mostre la so glòria. 8 Dio el ve farà firmi fin ala fin, cossita nel giorno del nostro Signor Gesù Cristo nissun el gavarà rason de acusarve. 9 Dio l’è fedele, e Dio el ve ga scoliesto par esser in union col so Fiol, Gesù Cristo nostro Signor. 10 Adesso, fradei, ve domando nel nome del nostro Signor Gesù Cristo de parlar tuti de acordo e no gaver division intrà de valtri ma de esser del tuto in union nel medèsimo pensamento e nela medèsima maniera de rassiossinar. 11 Infati, me fradei, qualchedun dela casa de Cloe el me ga dito che ghen’è barufe intrà de valtri. 12 Son drio dir che valtri disé: “Mi son de Paolo,” “Ma mi invesse de Apolo,” “Mi de Cefa,” “E mi de Cristo.” 13 Sarà che el Cristo l’è spartio? Paolo l’è stà picà su nel pal par valtri? O fursi valtri sì stati batesadi nel nome de Paolo? 14 Mi ringràssio Dio che no go batesà gnanca un de valtri, ma sol Crispo e Gaio, 15 cossita nissun el pol dir che l’è stà batesà nel me nome. 16 l’è vera che go batesà anca quei dela casa de Stèfana; ma mi no me ricordo de gaver batesà pi nissuni. 17 Parché Cristo no’l me ga mandà batesar ma proclamar le bone notìssie; e nò col saver dela parola, parché senò la morte del Cristo nel pal de tortura no la serviria par gnente. 20 Ndove che l’è el omo sabio? Ndove che l’è el maestro dela lege? Ndove che l’è quel de questo mondo che el fà discussion? Dio no’l ga fato stùpido el so saver? 26 Fradei, valtri savé che no ghen’è tanti che, par i òmini, i ga tanto saver, gnanca tanti che i ze poderosi, gnanca tanti de fameia importante intrà de valtri che sì stati scoliesti. 27 Ma, Dio el ga scoliesto le robe che no le ga valor par el mondo par far quei che i sa restar invergognadi, e Dio el ga scoliesto le robe fiache del mondo par far le robe forte restar invergognade. 28 Dio el ga scoliesto le robe sensa valor del mondo e che nissuni i ghe bada, le robe che no le ze importante, par finir cole robe che le ze importante. 29 Parché cossita nissun se fae veder davanti de Dio. 30 Ma l’è gràssie a Dio che valtri sté in union con Cristo Gesù. Lu el ne ga mostrà el saver che vien de Dio, el ne ga fato esser giusti e santi davanti de Dio e el ne ga liberà par meso del risgate, 31 par che el sìpia cossita come l’è scrito: “Quel che el ga orgòlio, che el gàpia orgòlio par causa de Geovà.”