Deuteronómio

15 Durante sete giorni, te ndarè selebrar la festività par Geovà, el to Dio, nel posto che Geovà el scolierà, parché Geovà, el to Dio, el te benedirà in tute le to racolte e in tuto quel che te farè. E te sarè tanto contento. 16 “Tuti i òmini i ga de ndar tre volte al ano davanti de Geovà, el vostro Dio, nel posto che lu el ndarà scòlier: nela Festività dei Pan sensa Levà, nela Festività dele Stimane e nela Festività dele Tende, e nissuni de lori i ga de ndar davanti de Geovà cole man vode. 17 La oferta che cada un el portarà la gavarà de esser de acordo cola benedission che Geovà, el vostro Dio, el ghe ga dato. 18 “Te ghè de scòlier giuisi e òmini responsàbili par cada tribo in tute le cità che Geovà, el to Dio, el te darà. Lori i ga de giulgar el pòpolo con giustìssia. 19 No te ghè de ndar contra quel che l’è giusto, gnanca far difarensa intrà le persone. No stà acetar un presente fato par influensar una dessision, parché questo fà i sabi restar orbi e el pol cambiar le parole dele persone giuste. 20 Te ghè de ndar in serca dela giustìssia, si, dela giustìssia. Cossita ti te seitarè vivo e te sarè paron dela tera che Geovà, el to Dio, el te dà.