Levìtico

6 Alora Moisè el ga fato Aron e i so fioi rivar darente, e li ga lavadi con àqua. 7 Dopo, el ga metesto su in Aron una roba longa, el ga metesto una fassa nela so sintura e el ghe ga metesto su una roba longa sensa màneghe. E par sora el ghe ga metesto el èfode, e el ga ligà ben firme el èfode col sinto bordà. 8 El ghe ga metesto su el petoral e el ga metesto el Urin e el Tumin nel petoral. 9 Alora el ga metesto su el turbante nela so testa e davanti del turbante el ga metesto la placheta de oro che slusa, che l’è el segnal sacro de dedicassion, pròpio come Geovà el gavea ordinà a Moisè. 12 Alora, el ga metesto un poco de òio de unsion sora la testa de Aron e lo ga untà par santificarlo. 13 Alora Moisè el ga fato i fioi de Aron rivar darente, el ghe ga mestesto su le robe longhe e le fasse, e el ga metesto i turbanti nele so teste, pròpio come Geovà el gavea ordinà a lu. 14 Alora el ga menà el toro par la oferta del pecato, e Aron e i so fioi i ga metesto le man sora la testa del toro dela oferta par el pecato. 15 Moisè el ga copà el toro, el ga metesto col so deo un poco de sangue sora tuti i corni del altar e el ga purificà el altar dei pecati. Ma el ga ciapà el sangue che ghen’era ancora e lo ga metesto nela base del altar. Cossita, lo ga santificà par far sacrifissi de perdon dei pecati sora el altar. 16 Dopo Moisè el ga ciapà tuto el grasso che ghen’è intorno dele budele, la parte grassa che ghen’è intorno del figà e i due rognoni col so grasso, e li ga fati fumegar nel altar. 17 Alora, lu el ga fato brusar fora del acampamento el resto del toro, o sia, la pel, la carne e el sterco, pròpio come Geovà el gavea ordinà a Moisè. 31 Alora, Moisè el ga dito a Aron e ai so fioi: “Gavé de far boier la carne nela entrada dela tenda de riunion. Lì gavaré de magnarla coi pan che i ze nela sesta dela designassion dei sasserdoti, cossita come Dio el me ga mandà far: ‘Aron e i so fioi i la magnarà.’ 32 Valtri gavé de brusar col fogo quel che vansa dela carne e del pan. 33 No gavé de slontanarve dela tenda de riunion par sete giorni, fin che i se finisse i giorni che ghe vol par la vostra designassion de sasserdote, parché ghe volarà sete giorni par designarve come sasserdoti. 34 Geovà el ga mandà far quel che ghemo fato ancoi parché i vostri pecati i sìpia perdonadi. 35 Valtri gavaré de restar nela entrada dela tenda de riunion giorno e note, par sete giorni. E valtri gavé de far quel che Dio el ga mandà far, cossita no ndaré morir, parché l’è stà cossita che Dio el me ga mandà far.” 36 E Aron e i so fioi i ga fato tuto quel che Geovà el ghe gavea mandà de far par meso de Moisè.