Nùmeri

6 Geovà el ga dito ancora a Moisè: 2 “Te ghè de dir ai israeliti: ‘Se un omo o una dona i fà una promessa spessial par viver come nasireo par Geovà, 3 no’l ga de bever gnente de vin o qualcossa che ghen sìpie àlcol. No’l ga de bever aseo de vin gnanca aseo che l’è fato de àlcol. No’l ga de bever gnente fato de ua, gnanca magnar ua, sia dela vigna o seca. 4 Par tuti i giorni che lu l’è nasireo, no’l ga de magnar gnente dela vigna, sia le ue verde o le scorse. 5 “‘Lu no’l ga de taiarse i cavei dela so testa par tuti i giorni che l’è nasireo. Lu el ga de restar santo, sensa taiarse i cavei, fin che se finisse i giorni che lu l’è dedicà a Geovà, el ga de assar cresser i so cavei. 6 Lu no’l ga de rivar darente de una persona morta fin che se finisse i giorni che el sarà dedicà par Geovà. 7 Ancora che el so pare, so mare, so fradel o so sorela i more, lu no’l ga de deventar impuro, parché el ga nela so testa el segnal de che l’è dedicà al so Dio. 8 “‘Tuti i giorni che lu el sarà nasireo, sarà giorni dedicadi par Geovà. 9 Ma se qualchedun el more de colpo dela so banda e i so cavei, el segnal che lu l’è dedicà a Dio, i deventa impuri, el gavarà de rapar la so testa nel giorno dela so purificassion. Lu el ga de raparla nel sètimo giorno. 10 E nel otavo giorno, lu el ga de portar al sasserdote due colombete o due colombe gióvene nela entrada dela tenda de riunion. 11 El sasserdote el darà una come oferta par el pecato e quel’altra come oferta brusada par domandar perdon, parché el ga pecà quando l’è rivà darente dela persona morta. Alora, la testa del nasireo la deventarà santa quel giorno. 12 E i so giorni come nasireo dedicà par Geovà i scominsiarà nantra volta. Lu el ga de portar un piegoreto, nel so primo ano de vita, come oferta par la colpa. Ma i giorni de nasireo che i ze passadi no i sarà contadi parché lu l’è deventà impuro. 24 “Geovà el te benedirà e el te tenderà. 25 Geovà el te darà la so aprovassion e el te mostrarà favor. 26 Geovà el te vardarà con bontà e el te darà pace.” 27 Lori i ga de doperar el me nome sora el pòpolo de Israel e cossita vao benedirli.”