Ati dei Apòstoli

17 Alora, nel viaio i ga passà par Anfìpoli e Apolonia fin che i ze rivadi a Tessalonica, ndove ghen’era una sinagoga dei giudei. 2 Come de costume, Paolo l’è ndato rento par parlar con lori. E par tre sabi, lu el ga rassiossinà con lori sora le Scriture. 3 lu el ga doperà quel che l’era scrito par spiegar e provar che el Cristo el gavea de sofrir e de esser ressussità dei morti. Lu el disea: “Questo l’è el Cristo, questo Gesù, che son drio proclamarve.” 10 Quando l’è rivà note, i fradei i ga mandà Paolo e Sila par Berea. Quando i ze rivadi, i ze ndati rento nela sinagoga dei giudei. 11 I giudei de Berea i gavea de pi voia de imparar de quei de Tessalonica, parché i ga acetà la parola con tanto entusiasmo. Lori i esaminea le Scriture cada di con atension, par capir se queste robe le era pròpio cossita. 16 Intanto che l’era drio spetarli in Atena, Paolo l’è restà pròpio inrabià quando el ga visto che ghen’era ìdoli in tute le bande dela cità. 17 Cossita, el ga scominsià a insegnar nela sinagoga ai giudei e ale altre persone che le adorea a Dio. E tuti i giorni el fea la medésima roba con quei che i era nela piassa pi importante. 22 Alora, Paolo l’è restà in pié in meso al Areòpago e el ga dito: “Òmini de Atena, go visto che valtri sì pi religiosi che le persone de altri posti. 23 Par esémpio, ero drio caminar e vardar con atension le robe che doperé par adorar. E go catà un altar che ghen’era scrito: ‘A un Dio che no lo cognossemo mia’. Mi son drio parlar pròpio de questo Dio che adoré sensa cognosserlo. 24 El Dio che ga fato el mondo e tuto quel che ghen’è, el Signor del cielo e dela tera, no’l vive in posti de adorassion che i òmini i ga fato. 25 Gnanca no ghe ocore che qualchedun lo sirva, come se ghe manchesse qualcossa, parché l’è lu che el ghe dà a tuti la vita, el fià e tute le robe. 26 Lu el ga fato de un sol omo tute le persone dele nassion par viver in tuta la tera. El ga scoliesto el tempo par che arquante robe le sucedesse e fin ndove che le persone le podaria viver. 27 E cossita le pol ndar in serca de Dio, anca a palpo, e sicuramente catarlo, anca se, in verità, no l’è distante de cada un de noantri. 28 Parché par meso de lu gavemo vita, semo boni de moverse e esistimo, come qualchedun dei vostri poeti i ga dito: ‘Parché anca noantri semo fioi de lu.’ 31 Parché el ga marcà un giorno par giulgar la tera con giustìssia, par meso de un omo che el ga scoliesto. E el ga dato la garansia a tuti i òmini quando lo ga ressussità de intrà i morti.