Eclesiasti

5 Tendi dei to passi sempre che te vè ala casa del vero Dio. L’è meio rivar darente par scoltar, che far un sacrifìssio come che i fà i stùpidi, parché no i se nicorde che i ze drio far quel che l’è rugno. 2 No stà gaver prèssia in parlar, e gnanca no stà assar che el to cuor el parle sensa pensarghe sora, davanti del vero Dio. Parché el vero Dio l’è nel cielo, ma ti te sì nela tera. L’è par quela che le to parole le ga de esser poche. 3 Parché tante preocupassion le fà insognarse. E parlar massa fà parlar panciane. 4 Sempre che te fè un voto a Dio, no stà meterghe tanto a far quel che te ghè dito, parché lu no’l ghe piase de quei che i ze stùpidi. Fà quel che te ghè prometesto. 5 L’è meio no far un voto che farlo e dopo no far quel che te ghè dito. 6 No stà assar che la to boca la te fae pecar, e no stà dirghe davanti del àngelo che l’è stà un sbàlio. Parché assar el vero Dio cativo par quel che te ghè dito e far che lu el finissa fora tuto quel che te ghè fato? 7 Parché, cossita come tante preocupassion le fà insognarse, anca tante parole le mena a robe sensa valor. Ma ti temi el vero Dio. 8 No stà spaventarte se quel che el ga autorità nela to region l’è drio far el poareto sofrir, o se no l’è drio dar ale persone el dirito de esser giulgade con giustìssia. Parché qualchedun che el ga ancora de pi autorità che lu l’è drio vardarlo, e sora questi ghen’è anca altri che i ga ancora de pi autorità. 10 Quel che el ama i soldi no ghen gavarà mai che basta... 12 Profondo ze el sono de quel che serve, sìpia che el magne poco o tanto. Ma la richessa del sior no lo assa mia dormir. 18 Mi go visto che l’è bon e giusto che la persona la magne, la beva e la goda de tuto el duro laoro che la fà soto el sol, nei pochi giorni che el vero Dio el ghe ga dato, parché questa la ze la so ricompensa. 19 E anca, quando el vero Dio el dà a un omo richesse e altre robe, e lo assa goderle, lu el ga de acetar la so ricompensa e restar contento col so laoro. Questo l’è el presente de Dio. 20 Cossita lu no’l ndarà veder passar i giorni dela so vita curta, parché el vero Dio lo assa consentrà nela alegria del so cuor.