Mateo
6 Ma, nel aniversàrio de Erode, la fiola de Erodia la ga balà davanti de tuti che i era lì. Erode l’è restà tanto contento 7 che el ga prometesto con un giuramento darghe tuto quel che la domandesse. 8 Ela la ga scoltà so mare e alora la ga dito: “Dàme la testa de Gioani, el Batesador, qua nte una travessa.” 9 El rè l’è restà triste, ma par causa del so giuramento e de quei che i era drio magnar con lu, el ga comandà che la testa la fusse data ala tosa. 10 Cossita, el ga mandà che se taiesse la testa de Gioani nela preson. 13 Quando Gesù el ga scoltà questo, l’è ndato via de lì nte un barco, fin un posto pi tranquilo, par restar lu sol. Una mùcia de gente vegnesta dele cità la ga savesto de questo e la ze ndata drio de lu a pié. 14 Quando l’è ndato do del barco, el ga visto una mùcia de gente. Lori i ghe fea pecà e el ga guario tuti i maladi. 17 Lori i ghe ga dito: “Noantri no ghemo gnente qua, sol sinque pan e due pessi.” 18 Lu el ga dito: “Porteli qua.” 19 E el ga dito a tute quele persone par sentarse do nela grama. Alora el ga ciapà i sinque pan e i due pessi e, drio vardar in su al cielo, el ga pregà a Dio. E, dopo de spartir i pan, li ga dati ai dissìpoli, e i dissìpoli li ga dati ale persone. 20 Tuti i ga magnà fin che bastea. Dopo, i ga tolto su 12 seste piene de quel che l’è vansà. 21 Intorno de 5.000 òmini e anca done e toseti i ga magnà. 23 Dopo che tute le persone le ze ndate via, Gesù l’è ndato nel monte lu sol par far orassion. Quando l’è vegnesto sera, l’è restà lì, lu sol. 24 El barco l’era belche tanto distante dela tera e el sgorlea de una banda al’altra in meso dele onde, par causa del forte vento che vegnea contra. 26 Quando i lo ga visto caminar sora la àqua, i dissìpoli i se ga spaurà e i ga dito: “L’è una vision!” E i ga scominsià a osar de paura. 27 Ma Gesù el ghe ga dito suito: “Coraio! Son mi. No sté gaver paura.” 28 Piero el ga rispondesto: “Signor, se te sì ti, màndeme che mi te vegna incontro sora la àqua.” 29 Lu el ga dito: “Vien!” Alora, Piero l’è ndà fora del barco e el ga caminà sora la àqua fin Gesù. 30 Ma, quando el ga vardà par el forte vento, el ga bio paura. Quando el ga scominsià a sfondarse, el ga osà: “Signor, sàlvame!” 31 Suito Gesù el ga stirà la man e lo ga ciapà. El ga dito: “Te ga mancà fede. Parché che te ghè bio dùbio?”